A oferta de formación do Centro de Posgrao e Formación Permanente da Universidade de Vigo (UVigo) amplíase cunha nova convocatoria de títulos propios de capacitación dixital no sector do transporte, mobilidade e loxística, con acceso gratuíto para toda a cidadanía. Con inscricións xa abertas, ao longo deste curso impartiranse cinco títulos, totalmente de balde, que se enmarcan nunha convocatoria do Plan de Recuperación, Transformación e Resiliencia financiada polo Fondo Europeo de Recuperación–Next Generation EU.
De balde e sen requisitos de acceso
Sen necesidade da ABAU ou de formación universitaria previa, estas formacións, impartidas en castelán, están abertas a toda a cidadanía europea ou con permiso de residencia no territorio español e xa son máis de 200 persoas de dentro e fóra de Galicia as que pasaron polas aulas no curso académico 2023/2024. Cunha duración de 15 créditos ECTS, os cursos comezan o 14 de novembro e as clases repartiranse ao longo de 4 ou 5 meses en horario de tarde varios días á semana.
A formación está enfocada ao sector do transporte e a loxística pero é aplicable a calquera ámbito, polo que os perfís que acceden son moi variados, dende persoas traballadoras ata estudantado, pasando por demandantes de emprego, con ou sen experiencia, procedentes de diferentes ámbitos como humanidades, ciencias sociais, científico-técnico…
Comezan en novembro, en Vigo e Ourense e tamén a distancia
Os cursos impartiranse en Vigo, na Facultade de Comercio en modalidade semipresencial, e en Ourense, na Escola Superior de Enxeñaría Informática, neste último caso coa opción de cursalos tamén de forma 100% virtual en modalidade síncrona, o que abre estes programas a calquera persoa independentemente da súa situación xeográfica. As competencias dixitais eríxense así coma un elemento fundamental para conseguir que a sociedade e as empresas españolas afronten os retos e aproveiten as oportunidades que ofrecen as novas tecnoloxías.
Campus de Ourense
A Escola Superior de Enxeñaría Informática acolle catro das cinco accións formativas, que se poden cursar presencial ou virtualmente. A primeira delas é o curso de Transformación áxil das organizacións, que ensinará ás persoas asistentes a aplicar unha ampla gama de coñecementos e habilidades relacionadas coas metodoloxías e enfoques de xestión Agile, Scrum, Kanban e Lean no ámbito profesional, para mellorar a calidade do proceso e ter un mellor control do mesmo, tendo máis capacidade de predición, control de tempos e redución de custos.
Outra alternativa é o curso Infraestrutura de datos aplicados ao sector do transporte, que axudará o alumnado a mellorar a súa experiencia profesional no ámbito do Big Data e, en concreto, no referido a analítica de datos e xestión da información a grande escala. Ademais, adquirirán coñecementos avanzados en analítica de datos e Business Intelligence aplicados ao Big Data, o cal lles permitirá mellorar as súas capacidades de manexo e análises de grandes volumes de datos, mellorar na análise para a toma de decisións empresariais fundamentais, identificar patróns e tendencias no ámbito empresarial así coma extraer información dos datos da empresa para mellorar a eficiencia operativa e axudar a realizar a toma de decisións estratéxicas futuras.
Necesidades do sector
No curso Dixitalización do sector do transporte e loxística atenderase ás necesidades do sector que requiren dunha transformación dixital sen deixar de lado as cuestións éticas e políticas do proceso. Trataranse solucións como e-transport documents, eCMR, sistemas de etiquetaxe dixital, xestión asistida de almacén, contable e de planificación de rutas, ERPS, tacógrafo dixital, ou o intercambio electrónico de datos EDI.
Finalmente, a oferta no campus de Ourense complétase co curso de Comunicación dixital para a mobilidade, no que as persoas participantes adquirirán a capacidade de entender e aplicar as novas estratexias de comunicación para a creación de novos modelos de negocio e oportunidades. Os avances na dixitalización, como a xeolocalización ou a inmediatez dos novos canais de comunicación permiten crear experiencias de usuario únicas e personalizadas e medir ou rexistrar a actividade de cara a mellorar a interacción co usuario e futuras comunicacións.
Campus de Vigo
A Facultade de Comercio na cidade de Vigo acollerá a acción formativa Innovación no modelo de negocio da nova mobilidade, un curso semipresencial que ofrecerá unha aproximación, dende as ciencias sociais, aos retos que expón a mobilidade do futuro prestando especial atención á cultura emprendedora, aos novos modelos de negocio e á innovación no desenvolvemento de solucións de mercado e novas propostas de márketing.
Os cursos comezarán o 14 de novembro pero as preinscricións estarán abertas ata o día 10 e toda a información pode atoparse na web do Centro de Posgrao e Formación Permanente da UVigo.
Buenas por favor me podria indicar si todavia puedo inscribirme capacitacion digital en comercio y logistica tel 642663771