O grupo de investigación de Proxectos e Planificación (PROePLA) da Universidade de Santiago de Compostela (USC) lidera un proxecto para desenvolver un sistema pioneiro de monitorizarización do control da humidade na biorrefinería de Palas de Rei (Lugo) da empresa Bioflytech, especializada na fabricación de produtos derivados de larva de mosca soldado negra. A humidade é unha das variables determinantes no proceso de engorde desta especie e resulta fundamental para a súa supervivencia e crecemento.
O proxecto, desenvolvido pola empresa a través da súa filial Alfaprogal (Alternative Fats and Proteins of Galicia), busca, coa posta en marcha de novas tecnoloxías de visión artificial e sensorización, establecer un modelo de apoio á toma de decisións, replicable a outras factorías, que permita automatizar o proceso para aumentar a produción con maior eficiencia e sustentabilidade.
“Trátase dun estudo complexo e novo polo tipo de biomasa coa que traballa Bioflytech. Ao ser seres vivos, no proceso de engorde das larvas inflúen multitude de variables. Desde o seu manexo, a temperatura, o tipo e achega de penso e auga ata a súa distribución. Nesta fase ocupámonoss de monitorizar a toma de decisión vinculada á humidade do cultivo”, explica o profesor da Escola Politécnica Superior de Lugo Tomás Cuesta, investigador principal do proxecto.
Un desafío: ciclo curto de crecemento e tamaño reducido
“As larvas de mosca soldado negra teñen un ciclo moi curto de crecemento e hai que adoptar medidas e actuar con gran rapidez. Se hai pouca auga, a larva morre, e se hai en exceso, deixa de desenvolverse, polo que é necesario lograr a humidade perfecta”, sinala Cuesta. A isto hai que engadir o reducido tamaño das larvas, o que dificulta aínda máis o seguimento e a operativa. “O noso obxectivo é atopar un parámetro facilmente identificable que nos sirva de referencia para tomar decisións de rego dos cultivos en base a un patrón común”, engade.
Solución mediante machine learning
Nas naves de Bioflytech situáronse termómetros de medición da temperatura ambiente e da temperatura e humidade no cultivo, sensores e tecnoloxía de visión artificial cos que se recollen, cada hora, datos dos cultivos. A través de programas de machine learning, a información obtida crúzase coa da toma de decisións, o que permitirá lograr resultados para estandarizar o control do rego durante o proceso de engorde e estabilizar o modelo de biorrefinería de insectos para obter graxas, proteínas e fertilizante de alta calidade.
A alianza coa USC permite a Bioflytech intensificar os seus plans de I+D+i, contando coa experiencia, o equipamento científico e a excelencia investigadora da institución académica. “Para a nosa empresa, contar co aval científico e o rigor da USC é un paso fundamental para consolidarnos como unha empresa competitiva, innovadora e de futuro, cun modelo de gandería estratéxica alternativa á tradicional, máis sostible e tecnolóxica, e con gran potencial de crecemento”, explica Jesús Rodríguez, CEO de Bioflytech.
O proxecto, co que se agarda alcanzar os primeiros resultados o próximo mes de outubro, está financiado polo programa IGAPE Innova, dirixido a mellorar a capacidade de innovación das empresas galegas.
