O ránking GreenMetric, que compara os esforzos das universidades de todo o mundo cara a sustentabilidade ambiental e as políticas de xestión respectuosas co ambiente, valorou á Universidade da Coruña como a mellor de Galicia neste eido. Esta clasificación, que realiza a Universidade de Indonesia, situou á institución coruñesa no número 13 a nivel estatal, dun total de 27. A Universidade de Santiago de Compostela aparece no lugar 17º, e a de Vigo no 24º.
A nivel mundial, a UDC acadou a posición 149, mentres que a USC está no 234 e a UVigo no 321. A universidade mellor valorada do Estado, a Autónoma de Barcelona, ocupa o posto 14º na clasificación mundial, que lidera a Universidade de California Davis. Na séptima edición deste ránking participaron, en total, 516 institucións de 75 países.
A información deste listado organízase en seis categorías: infraestruturas, enerxía e cambio climático, xestión de residuos, uso da auga, transportes e educación. É neste último eido no que a UDC destaca especialmente en educación (posición 47 a nivel mundial e 71,3% da puntuación máxima).
