A empresa galega Ecocelta crea a primeira area para mascotas de toda Europa feita a partir de residuos de cunchas de mexillón. O produto, denominado Arenamar, patentouse en agosto e xa está dispoñible no mercado. A compañía con sede en Ponteareas, tamén acaba de comercializar o primeiro biofertilizante do mundo patentado e con certificado ecolóxico para solos ácidos. O seu nome é Celtacal e tamén está elaborado a partir dos residuos de moluscos.
Destes dous produtos, Arenamar é o último que saíu do laboratorio de Ecocelta. “É unha solución local, unha alternativa sostible á actividade extractiva necesaria para producir este produto” en todo o mundo, destaca Sergio Quiroga, director da empresa, quen engade que xa se comercializa desde inicios deste ano a través de Gadisa. “Estes produtos elaborados a partir dos residuos de moluscos son resultado dunha investigación de cinco anos sobre economía circular para dar solución a un problema ambiental en Galicia”, apunta. Sergio Quiroga augura que “os residuos de cuncha de mexillón poderían agora ser reciclados de forma viable e sostible”.
As empresas conserveiras de Galicia xeran ao redor de 90.000 toneladas de cuncha de mexillón cada ano. “O impacto ambiental é evidente se o tratamento destes refugallos naturais non é o correcto”, apunta Sergio Quiroga. Ecocelta, xunto a representantes do sector conserveiro e depuradoras de molusco, iniciou en 2017 un proxecto que serviu para desenvolver o Método Celtacal, un proceso sostible e local de xestión da cuncha de moluscos que contou co apoio da Axencia Galega de Innovación (GAIN) a través do programa InnovaPeme. Esta investigación permitiu o desenvolvemento dun biofertilizante denominado Celtacal, o primeiro abono orgánico encalante rexistrado no mundo elaborado con cuncha do mexillón como materia prima.
O proceso foi protexido mediante patente en 2019. A comercialización comezou en 2020. O biofertilizante Celtacal está indicado para solos ácidos, dominantes en Galicia, especialmente viñas e horta. Ecocelta, xa en 2021 vende a patente e nace Celtacal SL, compañía que comercializa o produto xunto a Ecocelta.
Leito natural para mascotas
O departamento de I+D+i de Ecocelta, a iniciativa propia e sen apoio externo, continúa adiante co proxecto de economía circular. A inicios de 2022 certificou que un subproducto inorgánico procedente da fabricación do Celtacal é adecuado para substituír a area de sepiolita utilizada como leito hixiénico de mascotas, especialmente gatos. Sergio Quiroga destaca que “o actual consumo de sepiolita, un mineral absorbente base da area para animais domésticos, é a gran escala, de orixe extractiva e non compostable”.
Ecocelta decide seguir investigando e conclúe que este produto ten propiedades especiais para eliminar o cheiro dos excrementos do gato. A compañía decide, ante os resultados do proxecto, deseñar un prototipo de envase e realiza un lanzamento Lean Startup para coñecer a resposta do mercado. En marzo de 2023 lanza o produto, que comercializa na cadea de establecementos de Gadisa. Ecocelta obtén en agosto de 2023 a patente de Arenamar, un leito hixiénico para mascotas totalmente natural que se presenta como unha alternativa local e sostible ás areas para mascotas que se ofertan no mercado.
En España hai rexistrados case seis millóns de gastos. E cada gato consome unha media de 200 quilos anuais de leito hixiénico. “Procesando toda a cuncha de mexillón residual existente en Galicia poderíase producir area para 375.000 gatos”, calcula Sergio Quiroga, quen destaca que “se solucionaría un problema ambiental atendendo só a demanda que xeran o 6,5% dos gastos de todo o territorio español”.