Non é o primeiro traballo neste sentido. Hai tempo xa se demostrou que os patróns de cor a raias nos corpos das cebras inflúe á hora de escorrentar os insectos. Observouse que estes probablemente experimenten confusión a través dos seus sistemas de detección que controlan a aproximación e a aterraxe. De feito, xa se fixeron estudos cubrindo a cabalos con teas co patrón das cebras para observar estes comportamentos. Agora, un novo estudo que publica PlosOne expón que pintar ás vacas con raias de cebra reduce en máis da metade o número de moscas que pican ao gando vacún.
As picaduras de insecto son un quebranto habitual para os gandeiros. As vacas que se ven afectadas polas moscas e outros animais voadores pastan menos, durmen menos e provoca que se xunten en grandes grupos, o que estresa e lesiona ás veces aos animais.
Mentres buscaban unha solución a este problema, un equipo de investigadores xaponeses decidiu reproducir nas vacas o que a evolución fixo posible nas cebras. Así que pintaron seis vacas negras xaponesas con raias brancas. Despois disto, observáronas durante tres días, tomando imaxes de alta resolución para contar os insectos que as rondaban. Tamén rexistraron os posibles comportamentos repelentes das vacas (mover a cola, sacudir a cabeza ou as orellas, etc.). Do mesmo xeito, como control, pintáronlle tamén raias negras, contemplando a posibilidade de que fosen os compostos químicos da pintura os que espantasen ás moscas, e tamén se observaron sen raias de ningún tipo.
Os efectos foron notorios, segundo se expón no artigo. O número de moscas que picaron ás vacas foi de menos na metade cando estaban pintadas como cebras (en comparación coa súa cor habitual), e moito menos ca nas pintadas con raias negras. Ademais, as raias brancas reduciron os comportamentos repelentes nos animais aproximadamente nun 20%, o que indicaba que as vacas percibían de seu menos molestias dos insectos.
“Os resultados suxiren que pintar raias en branco e negro no gando pode previr os ataques das moscas que pican, e proporcionar un método alternativo para defender o gando destes insectos sen usar pesticidas na produción animal”, expoñen os investigadores no seu traballo.
Este é precisamente outro dos puntos nos que incide o traballo, xa que a industria gandeira adoita usar insecticidas para combater estes problemas. Por tanto, evitar o uso de compostos potencialmente tóxicos podería ser máis barato, saudable para o gando e mellor para o medio ambiente.
Porén, os investigadores matizan que antes disto, o estudo debe replicarse cunha mostra maior de vacas, así como en diferentes razas. “Poden precisarse técnicas máis efectivas para asegurar a persistencia das raias brancas e negras no gando durante os meses nos que aparecen máis problemas, sobre todo no verán.
Referencia: Cows painted with zebra-like striping can avoid biting fly attack (Publicado en PlosOne)
E digo eu, terán o mesmo efecto as camisetas a raias?