Se os pementos de Herbón e Padrón xa tiñan de seu suficientes virtudes para o éxito internacional, un peculiar xogo fixo que nos últimos anos a sona deste produto transcendera Galicia e se espallase polo mundo anglosaxón. É o coñecido como a ruleta rusa dos pementos, unha estratexia de márketing que xa leva anos desenvolvéndose no mundo anglosaxón, sobre todo en Inglaterra.
Con todo, a idea non é nova. En moitas casas galegas, a rapazada lembra ter participado neste pasatempo, ao estilo da terrible ruleta rusa, pero que por sorte, ten como único risco o de sufrir unha severa comechón.
No 2008, o Daily Mail informaba de que a cadea de supermercados Tesco ía poñer á venda os pementos de Padrón, baixo o sobre nome de “Russian roulette peppers“, a un prezo de 1,39 libras por unha bolsa de 100 gramos. Un empregado de Tesco sinalaba que o produto causaba sensación ao ser servido, xa que “non hai xeito de dicir cal é o que pica e cal non”. Recentemente, tamén falaron del no Oxford Mail.
Do mesmo xeito, Lonely Planet menciona o peculiar xogo nun dos seus blogs. O Huffington Post dedicaba outro artigo a falar deste peculiar fenómeno, e incluso mencionaba unha receita do cociñeiro español José Andrés, moi coñecido nos Estados Unidos, na que elaboraba nunha tixola uns pementos recheos de queixo de Arzúa. Outros cociñeiros norteamericanos, como John Broening, de Denver, tamén louvaban as curiosas propiedades destes vexetais con denominación de orixe galega.
