Algunha vez te preguntaches que pensa o teu can? Non es o único. Para respostar a esta pregunta uns 500 cidadáns de todo o mundo achegaron datos a un estudo en col do que sucede no interior da mente das súas mascotas e contribuíron a confirmar, entre outros achados, que os seus amigos caninos confían máis na súa memoria que no seu olfacto.
Para descubrir o funcionamento do cerebro dos cans, un grupo de investigadores quixo coñecer de primeira man a reacción destes animais ante determinados estímulos fóra dun laboratorio. Por iso, os científicos recorreron a quen ten unha relación máis estreita con eles: os seus propios donos.
O traballo publicado en PLoS ONE recolleu os datos achegados por 500 cidadáns que conviven cos seus cans e observaron o comportamento das súas mascotas mentres xogaban con elas. O significativo destas actividades é a súa similitude con aquelas que os investigadores levan a cabo no laboratorio con estes animais para entender mellor o seu xeito de actuar. Os datos deste estudo foron recollidos pola páxina web Dognition.com, desenvolvida por Brian Hare, profesor de Antropoloxía Evolutiva na Universidade de Duke (Estados Unidos), centrado no estudo do comportamento de cans e primates.
A revista Plos One publica os primeiros resultados do proxecto científico e cidadán
“Os membros da páxina web están a achegar datos de calidade e estes coinciden cos que están a obter investigadores en todo o mundo”, asegura Evan McLean, coautor da investigación e cofundador do Centro de Cognición Canina de Duke que lidera Hare.
Os donos participantes realizaron varios xogos coas súas mascotas seguindo as pautas indicadas polos investigadores en diversos vídeos. Un destes xogos demostrou que os cans confían máis na súa memoria que no seu sentido do olfacto. Para chegar a estas conclusións, os donos esconderon a comida baixo unha cunca mentres a súa mascota observáballes. A continuación, taparon os ollos do can e cambiaron a comida a outra cunca. De se guiaren polo seu olfacto serían capaces de elixir a cunca correcta, pero a maioría dirixiuse cara ao lugar onde vira escondida a comida por primeira vez.
A análise dos datos obtidos por Dognition amosou que os cans teñen un amplo abanico de habilidades cognitivas para explorar o mundo que teñen ao seu ao redor, que se estende desde ser bos comunicadores, ter unha boa memoria ou poñerse no lugar dos seus donos. “A maioría da xente pensa que os cans usan o seu sentido do olfacto para todo, pero en realidade teñen un amplo rango de habilidades para resolver problemas”, apunta McLean. Dognition conta con máis de 17.000 donos de cans que compartiron os seus datos cos investigadores. “Todo é posible cando tes tanta cantidade de datos. Isto podería axudarnos a responder a cuestións que desconcertaron aos científicos durante décadas”, conclúe Hare.
Podes atopar máis información
no seguinte enlace da Universidade de Duke
