Chegas a casa enfadado logo dun duro día de traballo e o teu can non vén saudarche. Non é raro, porque é posible que perciba o teu enfado. Por primeira vez, un experimento proba que os cans diferencian entre as expresións emocionais dos rostros humanos, en concreto, discriminan entre as caras de alegría e de enfado. Ningún outro animal demostrou unha capacidade como esta.
O novo traballo foi publicado en Current Biology “Trátase da primeira evidencia sólida desta habilidade en animais non humanos para distinguir entre emocións faciais doutra especie”, declara Ludwig Huber, coautor do traballo no Instituto Messerli da Universidade de Viena (Austria).
Nin sequera chimpancés, orangutáns ou gorilas amosaron ser capaces de distinguir os sentimentos nos rostros doutras especies. O primatólogo Frans de Waal, que non participou nesta investigación, confirma que “existen centos de estudos que mostran que os primates recoñecen expresións faciais, pero solo dos seus propios conxéneres”. En xeral, para os animais, “distinguir as emocións doutras especies non é moi interesante, porque que gañarían con iso?”, pregúntase. Con todo, os cans son unha excepción: “Alimentámolos para que convivan connosco, así que non é sorprendente que desenvolvan esta habilidade”.
Os cans asocian un sorriso humano a un significado positivo
Para chegar a estas conclusións, os investigadores fixeron un experimento con cans de diferentes razas como retrievers, pastores, border collies, terrier e mongrels. Amosáronlles imaxes con rostros de ledicia e enfado, tanto completas como de rasgos faciais soltos de ollos ou beizos. E acertaron coas caras que expresaban ledicia, pola que recibían unha recompensa.
Os investigadores cren que os cans saben que esas dúas expresións teñen diferentes significados; é dicir, que asocian un rostro ledo a un significado positivo e un rostro enfadado a un negativo.
Ademais, para os investigadores sería interesante comprobar se os cans comparten os nosos sentimentos, se amosan empatía, e se esa é unha das razóns polas que teñen unha relación tan estreita coas persoas.”Se sabemos que os animais son capaces de ler, comprender e reaccionar ás nosas emocións, esta investigación terá un gran impacto no coñecemento sobre as interaccións entre humanos e animais e no benestar animal”, conclúen.
