Dende 1972 existen minutos cun segundo de máis para readaptar o calendario humano co movemento dos astros. O próximo segundo extra será na noite do 30 de xuño ao 1 de xullo. Non obstante, hai moitos países en contra dese ‘segundo extra’, e amósanse máis partidarios de engadir unha hora cada 600 anos. Este segundo engadido é necesario para manter os estándares sincronizados cos calendarios civís, que teñen base astronómica.
A noite do 30 de xuño ao 1 de xullo, entre as 23:59 e as 00:00 horas, terá polo tanto un segundo máis. Aínda que, como é unha operación simultánea en todo o planeta Terra, técnicamente na hora de España o segundo extra vaise anotar ás 00.59 horas xa do mércores, porque a hora española é Greenwich +1, unha hora sobre o Tempo Universal Coordinado (UTC+1).
Fora deste tecnicismo tan preciso, para dicilo claramente, o 30 de xuño ten un segundo máis. O Servizo Internacional de Rotación da Terra e Sistemas de Referencia (IERS) do Observatorio de París anunciou a decisión. Dende o ano 1972 se engadiu un segundo máis nun total de 26 ocasións. A última vez que se engadiu este segundo ‘extra’ foi en 2012.
En 2012, houbo un desorde en Internet, que interpretou o cambio como un erro
Malia que os cidadáns non notarán a diferenza, “os grandes sistemas de navegación por satélite e os sistemas de sincronización das grandes redes de computadores deberán tomar en conta esta modificación para non ter problemas coas súas aplicacións informáticas”, explica Daniel Gambis, director do Servizo de Rotación da Terra.
Ese segundo ás 23:59:60 podería causar unha gran desorde en Internet como xa sucedeu en 2012 cando os servidores de Reddit ou LinkedIN o interpretaron como un erro.
A longo prazo, a Terra ten unha tendencia a desacelerarse, pola atracción gravitacional entre a Lúa e o Sol, responsable das mareas. Así mesmo, tamén depende de movementos atmosféricos, variacións dos xeos e forzas como os sismos.
Este segundo engadido chámase técnicamente ‘segundo intercalar’ e permite manter os estándares sincronizados cos calendarios civís, que teñen unha base astronómica.
A Unión Internacional de Telecomunicacións propuxo engadirlle unha hora ao reloxo cada 600 anos e abolir este tempo intercalar. China e Gran Bretaña opóñense ao cambio, pero Estados Unidos, Italia, Francia, Alemaña, Xapón e Rusia apóiano e, entre as alternativas, figura retroceder ao reloxo unha hora cando a variación acumule un atraso de media hora. Segundo os cálculos da Universidade de Bonn, iso acontecería en 2600.
