Estes bechos viven, comen e teñen sexo na túa propia cara

Aínda que nos sorprenda, todos os seres humanos convivimos con animais. De feito, na nosa pel viven por milleiros uns bechos diminutos que se alimentan, nacen, morren ou practican sexo sen que reparemos neles. Falamos dos ácaros, que constitúen un auténtico zoo que paseamos polo mundo sen decatarnos. Aínda que recentes investigacións revelan que algunhas doenzas cutáneas, como a rosácea, están relacionadas con eles e as súas actividades enriba de nós.

Os ácaros son parentes das carrapatas, as arañas, os escorpións e outros arácnidos. E hai descritas máis de 48.000 especies, das que arredor de 65 deles pertencen ao xénero Demodex, do que dúas variedades habitan na nosa propia cara: D. folliculorum e D. brevis.

Publicidade

Estes dous ácaros teñen preferencia por vivir en humanos, ao igual que o Demodex canis prefire habitar na pel dos cans. O seu aspecto, coas súas oito patas, non resulta moi simpático, pero miden so un terzo de milímetro de longo. Así que non os podemos observar a simple vista.

Demodex folliculorum foi descrito en 1842 polo dermatólogo alemán Gustav Simon, quen se sorprendeu ao atopar nun anaco de pel ao microscopio unha especie de “verme con patas”. Definitivamente, atopou un animal que vivía na nosa propia cara.

Estes ácaros son os nosos ectoparásitos máis comúns (aqueles que permanecen na superficie dos nosos corpos, en lugar de cavar dentro). Están en todos os grupos étnicos humanos. E non están na nosa pel no momento de nacer: suponse que os adquirimos pouco despois por contacto con nosos pais ou outros humanos.

Estes ácaros pasan a maior parte do seu tempo enterrados de cabeza nos nosos folículos pilosos, onde temos o noso cabelo. Atópanse máis comunmente nas nosas pálpebras, nariz, fazulas, fronte e queixo. Pero tamén poden vivir fóra da faciana, nos brazos, as mans ou no peito.

E que fan na nosa cara os ácaros Demodex nos 16 días que teñen de vida media? Básicamente, alimentarse das células situadas nos folículos. As nosas pestanas son un dos seus lugares favoritos. E ademais se moven: tardan unhas doce horas en ir dende a túa orella ata o nariz.

Pero hai dous aspectos dos Demodex da nosa cara que resultan pouco agradables. O primeiro é que carecen de ano, polo que non poden defecar. Cando morren, simplemente estouran. E eses detritus están relacionados con algunhas doenzas cutáneas, como a rosácea.

Ademais, practican sexo na nosa faciana. Machos e femias aparéanse e, despois do sexo, elas enterran no folículo os ovos, que seis días despois eclosionan para dar lugar a novos ácaros Demodex.

Pero, aínda que todo isto poida parecer desagradable, a realidade é que estes ácaros non representan ningún problema para a meirande parte das persoas. Moi  poucas teñen reaccións cutáneas por mor deles. E os científicos seguen a investigar sobre estas diminutas criaturas que viven na nosa cara.

E aquí podes ler o artigo científico sobre a relación entre Demodex e rosácea