O fenómeno da visión non está só nos nosos ollos. Nin tampouco na luz que percibe a nosa retina. Porque o noso cerebro é o que interpreta a información que recibe. E tamén pode enganarnos. Así acontece coa imaxe que encabeza este artigo: ves uns amorodos vermellos? Pois non son vermellos. De feito non hai nin un só píxel vermello na foto. E tanto ten que agora saibas a verdade: o teu cerebro segue a ver os amorodos vermellos, porque supón que son normalmente desa cor.
Tampouco vai cambiar nada se ves a foto orixinal en branco e negro cun filtro azul. O teu cerebro seguirá a ver vermellos os da esquerda. E mesmo chega a imaxinar que os amorodos da dereita tamén teñan esa cor. Pero como é posible tanto engano?
A foto foi creada por Akiyoshi Kitaoka , un profesor de psicoloxía na Universidade Ritsumeikan en Xapón, que se especializa en crear ilusiones ópticas. E a explicación do fenómeno está na constancia de cor, un mecanismo polo que o noso cerebro axusta as cores, aínda que cambie a iluminación.
This picture has NO red pixels. Great demo of color constancy (ht Akiyoshi Kitaoka) pic.twitter.com/pZHvbB6QHE
— Matt Lieberman (@social_brains) 27 de febrero de 2017
A constancia de cor é un exemplo de constancia subxectiva e supón unha característica do sistema de percepción humano que garante que a cor percibida dos obxectos permaneza relativamente constante en diferentes condicións de iluminación.
Unha mazá verde, por exemplo, parécenos verde ao mediodía, cando a iluminación principal é a luz do sol branca, e tamén á tardiña, cando a iluminación principal é vermella.
Isto axúdanos a identificar obxectos. A constancia de cor é un proceso que permite que o cerebro recoñeza un obxecto familiar como unha cor consistente, independentemente da cantidade ou lonxitude de onda da luz que se reflicte nun momento dado.
Así que, de xeito inconsciente, o cerebro tenta ver sempre as mesmas cores nos obxectos, mesmo se a iluminación é moi distinta. Non esquezamos que un dos primeiros obxectivos da visión é garantir a supervivencia. Por iso é vital que o noso cerebro identifique as cousas rápidamente, para o cal é fundamental a cor. E, con ela, o fenómeno da constancia de cor que nos fai ver vermellos os amorodos da foto.
