Xoves 28 Marzo 2024

Como miramos os cidadáns aos candidatos ás eleccións?

Polo xeral, dedicamos máis tempo a observar os slogans e logotipos que aparecen nos carteis electorais que a cara do candidato ou candidata, aínda que é ao rostro dos fotografados o lugar ao que máis veces diriximos a nosa mirada. Mais este é un hábito con excepcións, como veñen de comprobar os investigadores do grupo Necom, da Facultade de Ciencias Sociais e da Comunicación da Universidade de Vigo, que, mediante o uso do eye-tracking, un sistema de seguimento dos ollos, estudaron os puntos que captaban unha maior atención dos carteis electorais empregados polos principais partidos nas eleccións xerais do 20 de decembro. O estudo que nestes días presentan no simposio Xescom, en Quito, permitiu aos investigadores Xosé Rúas, Iván Puentes e Verónica Crespo constatar como os ollos de Alberto Garzón (IU) atraían antes a mirada que os elementos gráficos como os de Pedro Sánchez (PSOE) eran observados durante máis tempo que o logotipo do partido, así como que as mulleres tenden a fixar máis rápido a vista nos ollos dos candidatos que os homes.

“Aínda que non ten relación directa coa simpatía por un candidato, os datos que che proporciona este sistema son obxectivos”, salienta Rúas do estudo que realizaron cun “eye-tracking experimental”, ao que, grazas á colaboración dos servizos informáticos do campus, dotaron dun software co que analizar a que zonas dunha imaxe se dirixían os ollos antes e cales captaban a atención visual durante un maior período de tempo. “Analizamos tres puntos de interese, o logotipo do partido, o slogan e a cara do candidato, especialmente os ollos e a boca”, explica o investigador principal do grupo Necom do experimento que realizaron cun grupo de 27 estudantes e profesores das tres universidades galegas, aos que amosaron, de forma aleatoria, os carteis electorais de PP, PSOE, Podemos, Ciudadanos e IU durante dez segundos.

Publicidade

Analizouse onde se fixa o cidadán por primeira vez e o percorrido visual que fai

“O programa analiza onde fixas vista por primeira vez e o percorrido visual que fas”, explica Rúas do dispositivo co que puideron constatar como, se ben os logotipos e lemas son, polo xeral, os elementos que se observan durante máis tempo, posiblemente debido “ao tempo necesario para a decodificación da información”, son os rostros dos candidatos os que rexistran un maior número de visualizacións. Así o recollen nos “mapas de calor” nos que representaron graficamente o número de veces que a ollada se detiña nos diferentes elementos e nos que a única excepción dos cinco carteis analizados, atópase no de IU, no que é o nome do candidato e non a súa cara o que máis veces centrou a mirada dos participantes no estudo.

Xosé Rúas (esquerda), Iván Puentes (dereita) e Verónica Crespo realizaron esta análise.
Xosé Rúas (esquerda), Iván Puentes (dereita) e Verónica Crespo realizaron esta análise.

Por outra banda, os resultados deste estudo tamén permiten concluír aos investigadores que as mulleres fixan antes que os homes a súa vista nos ollos dos candidatos, sendo Garzón o político que máis rápido atrae a súa mirada e o que a capta durante máis tempo, xunto con Pablo Iglesias (Podemos). Os homes, pola contra, detivéronse en maior medida nos ollos de Pedro Sánchez e Mariano Rajoy. Do mesmo xeito, aínda que ambos sexos concentran a maioría das visualizacións no rostro, as mulleres “manifestan un maior interese visual nos compoñentes textuais, fundamentalmente nos slogans”, segundo recollen os investigadores na comunicación que nestes días presentan en Quito.

Analizáronse tres puntos: o logo do partido, o eslogan e o rostro do candidato

Con respecto ao tempo medio da primeira fixación, o período transcorrido desde que se amosa o cartel ata que se fixa a vista por primeira vez nun elemento, os resultados “varían de acordo co deseño de cada cartel” e o tamaño dos elementos. Por exemplo, no caso do PSOE é o logotipo o que máis rápido se observa, mentres que no do PP ou Ciudadanos foron os slogan os que primeiro captaron a mirada. Así mesmo, o lema dos populares España en serio foi o elemento que máis rápido captou a mirada dos participantes no estudo, cunha media de 558 milisegundos, situándose no outro extremo o logo de Ciudadanos como o que máis tempo requiriu para unha primeira visualización.

Os resultados deste experimento recóllense na comunicación Neurociencias aplicadas a la comunicación política: Análisis de carteles electorales con Eye-Tracking, que Puentes e Crespo presentan no II Simposio Internacional sobre Xestión da Comunicación, que este xoves e venres se desenvolve na Universidad Técnica Particular de Loja, en Ecuador. Promovido pola Red Internacional de Investigación en Xestión da Comunicación, que coordina o profesor da USC Francisco Campos e que integran os grupos de investigación Novos Medios, da institución compostelá, iMarka da UDC e o propio grupo Necom, a segunda edición dun congreso celebrado en 2015 no campus pontevedrés e impulsado no marco dun proxecto de investigación financiado pola Consellería de Cultura, Educación e Ordenación Universitaria, reúne no seu programa a presentación de máis dun cento de investigacións.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Antonio López encara o seu segundo mandato na USC tras ser reelexido reitor

O catedrático de Dereito Financeiro e Tributario, único candidato nos comicios, obtivo un total de 1.636 votos

O científico galego Manuel Carreiras recibe o Premio Nacional de Investigación

Os reis de España e o ministro de Ciencia presidiron a entrega dos galardóns que recoñeceron a científicos de diversas áreas

Saber vivir ‘amodiño’: eloxio da lentitude desde a filosofía

O autor aborda a problemática do estrés e a velocidade na vida cotiá da actualidade, e avoga por recuperar a pausa: "A lentitude é subversiva", di

O Constitucional anula o artigo que permitía a espionaxe política nas redes sociais

O Pleno rexeitou o apartado 1 do artigo 58 da LOREG, que daba vía libre á "compilación de datos persoais relativos ás opinións políticas das persoas"