Unha nova ferramenta de uso gratuíto, denominada Facebook Data Valuation Tool (FDVT), foi desenvolvida por enxeñeiros do departamento de Telemática da Universidade Carlos III de Madrid (UC3M). A tecnoloxía permite visualizar os ingresos por publicidade que xera cada usuario de Facebook. A iniciativa está parcialmente financiada polo Data Transparency Lab, impulsado polo MIT, Telefonica e Mozilla, que promove a transparencia na internet, co obxectivo de concienciar aos usuarios da importancia de protexer a súa privacidade dixital.
A aplicación, lanzada recentemente e que funciona en Facebook e no navegador Chrome, axuda a visualizar en tempo real os ingresos por publicidade que vai xerando a navegación na rede social. Para a súa utilización, o usuario só ten que descargar a aplicación e facilitar uns datos básicos sobre a súa identidade (idade, xénero, estado civil, intereses, localización, etc.) para que a ferramenta identifique o valor económico do seu perfil no mercado da publicidade, un sector volátil sometido a unha oferta e demanda moi variables.
O usuario só ten que descargar a aplicación e facilitar uns datos básicos
“Evidentemente, cada un de nós temos un prezo, por tanto, a ferramenta darache a valoración que ti estás a xerar”, din os irmáns Ángel e Rubén Cuevas, profesores da UC3M e desarrolladores da aplicación xunto con José González, un estudante de doutoramento. “Cando te conectas a Facebook e recibes un anuncio, o que facemos é obter a valoración, o prezo que os anunciantes pagan por mostrarche ese anuncio a tí, así como o prezo que eses anunciantes pagan por cada clic que fas nun deses anuncios”, explican.
O custo medio dun usuario en España vén ser a metade que un de Estados Unidos, pero é importante entender que ese valor cambia ao longo do tempo, engaden. Facebook ingresa diñeiro por publicidade continuamente, “mesmo cando o internauta dentro da súa plataforma nin sequera pica nos anuncios”, explican. Cada vez máis o sector da publicidade “perfila ata o último detalle” dos seus potenciais clientes, aos que dirixen anuncios personalizados en función das súas características persoais para mellorar o seu rendemento, asegura Ángel Cuevas.
O custo medio dun usuario en España vén ser a metade que un de EE.UU.
Debe garantirse un equilibrio entre esa personalización da publicidade (que pode ser consentida expresamente polo usuario para mellorar a súa experiencia) e a garantía de manter os seus dereitos fundamentais, engade. É importante que as empresas que manexan publicidade sexan transparentes nas súas actuacións cos datos doutros, insisten os investigadores. “Non queremos demonizar nin a Facebook, nin a Google, nin a ningunha outra plataforma por xerar beneficios coa publicidade, un sector sen dúbida xerador de crecemento económico e emprego”, afirman. Ao que se insta ás empresas con este tipo de ferramentas é a actuar con transparencia á hora de informar sobre que fan cos datos de terceiras partes, subliñan.
A ferramenta foi desenvolvida no marco do proxecto europeo e forma parte do proxecto europeo TYPES (Towards transparencY and Privacy in the onlinE advertising business) do programa Horizonte 2020. Empresas como Telefónica I+D, a rede EURECAT, a Asociación de Usuarios da internet (AUI) ou IAB Europa forman parte do consorcio internacional que impulsa o proxecto europeo TYPES, cunha participación española en torno ao 50%. No proxecto participan tamén entidades de Alemaña, Grecia e Israel.
