A UVigo patenta drones para detectar minas antipersoa

Sistema radar embarcado no drone patentado para detectar minas antipersoa. Foto: DUVI.
Sistema radar embarcado no drone patentado para detectar minas antipersoa. Foto: DUVI.

Froito da colaboración que comezaron hai un par de anos, pero que se remonta seis máis atrás, as universidades de Vigo e Oviedo patentaron drones coa finalidade de detectar minas antipersoa e medir emisións electromagnéticas de antenas. O catedrático Antonio García Pino e os investigadores Borja González-Valdés e Yolanda Rodríguez Vaqueiro do Departamento de Teoría do Sinal e Comunicacións do centro de investigación atlanTTic da Universidade de Vigo e os seus homólogos do grupo de Teoría de la Señal y Comunicaciones de la Universidad de Oviedo María García Fernández, Yuri Álvarez López, Fernando Las Heras Andrés e Ana Arboleya Arboleya integran o equipo que, a través da aplicación da súa experiencia en I+D en enxeñaría de telecomunicación ao mundo dos drones, foron quen de acadar estas aplicacións, que abren novas liñas de aproveitamento para a administración pública e para as empresas.

O enxeñeiro Borja González-Valdés. Foto: DUVI.
O enxeñeiro Borja González-Valdés. Foto: DUVI.

“Esta iniciativa comezou cun proxecto para embarcar sistemas radar en drones para detectar minas e tubaxes enterradas, entre outras cousas, e a partir da tecnoloxía que utilizamos para facer iso adaptouse para a medida de antenas, cos mesmos sensores e co mesmo sistema de posicionamento, sobre todo, adaptáronse para as antenas”, explica, que sinala que o papel principal desenvolvido pola representación viguesa no proxecto centrouse en axudar aos seus socios en cuestións de posicionamento e no procesado de datos.

Mentres para a detección das minas antipersoa emprégase un radar embarcado nun drone, a medición de emisións electromagnéticas de antenas, abre a porta a medir o funcionamento de antenas, por exemplo en estacións de telefonía móbil ou de radiodifusión, evitando que haxa que desmontalas para comprobar o seu estado ante determinadas incidencias.

Fronte as aplicacións de drones baseadas en sensores como cámaras de vídeo, fotografía e térmicas, as e os investigadores de Vigo e Oviedo introduciron novos sensores de bandas de radiofrecuencia e microondas que permiten explotar as propiedades destas ondas para “ver o invisible”, segundo eles mesmos explican. “Nós temos dúas patentes, unha sobre o sistema de detectar minas e outro sobre o sistema de antena. Pasaron o exame previo e ningunha das dúas se fixera antes e son patentes concedidas e a tecnoloxía que se emprega nun e noutro caso é bastante similar”, explica Borja González-Valdés en relación coas dúas aplicacións. Así, nun caso a aplicación toma como base un radar que emite ondas de radiofrecuencia capaces de atravesar o solo as paredes e capta a resposta de posibles obxectos ocultos e combinando diferentes medidas obtense unha imaxe de alta resolución deses obxectos. Outras aplicacións desta primeira patente centraríanse na obra civil para detección de tubaxes á hora de decidir onde realizar unha escavación e en arqueoloxía, para localizar restos de xeito non invasivo.

Os sensores de radiofrecuencia e microondas permiten aos drones “ver o invisible”

No caso da segunda patente, para a inspección de antenas, combinouse a experiencia adquirida na aplicación da detección de minas cos coñecementos sobre medida de antenas e emisións electromagnéticas do grupo da Universidade de Oviedo. Así, aproveitando o logros no posicionamento preciso dos drones, que é unhas dez veces mellor que a proporcionada por un GPS convencional e técnicas novidosas de medida de antenas, é posible medir e diagnosticar o funcionamento dunha antena.

Os prototipos desenvolvidos polas investigadoras e investigadores foron validados de xeito satisfactorio en condicións reais de operación, dispoñendo de autonomías de voo de 15 a 20 minutos. O proxecto conta coa colaboración do Ministerio de Economía y Competitividad, da Xunta de Galicia, o Goberno del Principado de Asturias e do Instituto Universitario de Tecnología Industrial de Asturias.

1 comentario

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.