Presentación do novo equipamento da Área de Simulación Médica. Foto: USC.
Presentación do novo equipamento da Área de Simulación Médica. Foto: USC.

PAUL, o bebé de simulación para os profesionais da saúde de Santiago

A Facultade acolleu este xoves a presentación do novo equipamento da Área de Simulación Médica

A Facultade de Medicina da USC presentou este xoves 28 novo equipamento da área docente de Simulación Médica do centro, espazo que prestará servizo tanto ao propio centro docente como á Área Sanitaria de Santiago de Compostela e estará dirixida a profesionais da Medicina, Odontoloxía e Enfermaría coas súas relativas especialidades, dende o ámbito da formación de grao ata o da formación de posgrao e formación continua.

Entre o novo equipamento da área destaca PAUL, o primeiro simulador High emotion prematuro para unha formación realista en coidados críticos en neonatoloxía. Segundo o decano da Facultade, Julián Álvarez Escudero, é unha tecnoloxía moi avanzada e da que existen poucas unidades en centros docentes. Tamén se inclúe un simulador para adestramento en ecografía máis realista, versátil e integrado e o simulador CAE VimesixAR coas Microsoft HoloLens.

O espazo de simulación da Facultade de Medicina é unha achega importante á mellora do modelo educativo do centro compostelán, que incorpora ferramentas novidosas que simulan de xeito hiperreal e seguro situacións coas que o alumnado precisa familiarizarse, explicou o decano. Como tamén sinalou Álvarez Escudero, “nun futuro a curto e medio prazo, as unidades de simulación deberán estar plenamente incorporadas tanto ás institucións asistenciais como ás educativas. Deste xeito, estas áreas docentes están chamadas a atender a alumnado con necesidades e niveis de formación diversos, dende a simulación odontolóxica ata a obstétrica, a cirúrxica e de politraumatismo”.

Outro dos equipos incorporados é SECTRA, unha ferramenta de ensino e aprendizaxe interactiva que usa anatomía real e casos clínicos para desenvolver un pensamento crítico en capacitación clínica, e un adestrador de infiltración intraarticular do ombro para a práctica da inxección nos tecidos brandos utilizada para o tratamento das lesións e a artrite. O equipamento representa la anatomía normal con precisión (tanto por encima e por vía subdérmica) con fins de palpación.

O reitor Antonio López Díaz presidiu o acto deste xoves, no que ademais de Julián Álvarez Escudero, tamén participou o secretario xeral de Universidades, José Alberto Díez de Castro. Segundo expón a USC, a educación médica baseada na simulación é un campo en pleno proceso de desenvolvemento cuxa evolución nos próximos anos é imprescindible. A súa implantación permitirá reproducir situacións reais con pacientes dunha forma guiada e controlada. En palabras do reitor Antonio López, a nova dotación permitirá á Facultade de Medicina seguir loitando por manter os éxitos que a teñen situado na elite da formación médica en España. A incorporación de novos recursos como os presentados hoxe xunto coa aposta decidida polo capital humano do centro resumen dúas liñas de traballo capitais para a USC no relativo á Facultade de Medicina.

O secretario xeral de Universidade lembrou, pola súa parte, que a de Santiago de Compostela é a Facultade de Medicina máis grande de España por número de estudantes, polo que mostrou o compromiso da administración autonómica para “tratar que a un centro desa dimensión lle corresponda un equipamento e instalacións acordes”.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.