O nacemento dun medio de comunicación serio e rigoroso é sempre unha boa nova para Galicia, xa que achega unha perspectiva sobre a realidade que enriquece a diversidade informativa e, polo tanto, incentiva a saúde democrática da sociedade galega.
Estamos de parabéns porque podemos celebrar o décimo aniversario da publicación dos primeiros artigos de Gciencia. Dous lustros despois, comprobamos que aquela iniciativa tense convertido nun piar fundamental da escena mediática científica galega.
Gciencia é, sen dúbida, garante do acceso en lingua galega ao coñecemento científico especializado, sendo ponte entre a cidadanía, a ciencia e as persoas que dedican a súa vida a conseguir que avancemos cara a un futuro mellor co seu traballo. Pero, ademais, Gciencia é un dos principais medios cos que a cidadanía galega conta para loitar, da man do rigor, contra as epidemias de información, ou infodemias, relacionadas con temas de carácter científico especializado como vimos nos últimos tempos, por exemplo, no caso da pandemia mundial causada pola irrupción da covid-19.
É innegable que o feito de que calquera galega ou galego poidan ler na súa lingua os últimos avances científicos é fundamental para a configuración da identidade da Galicia do presente e do futuro como unha sociedade crítica.
Por estes motivos, e outros moitos, longa vida a Gciencia!
