O pasado domingo, un gol de Iago Aspas deulle a vitoria ao Celta no derbi galego contra o Deportivo. Foi o máis seguido, mais non o único enfrontamento entre equipos da Coruña e Vigo que se viviu nunha competición nacional. A comezos de mes, o 5 de marzo, os Thunders de Vigo enfrontáronse aos Octopuses da Coruña na primeira xornada da OG Series University, a primeira liga estatal de deportes electrónicos. Nesta ocasión, na partida, coma no fútbol, tamén resultaron vencedores os vigueses.
Na competición participan 32 universidades de todo o Estado. Xogan ao League of Legends, un dos xogos en liña máis coñecidos da rede. Os representantes galegos son estes dous equipos de estudiantes, pertencentes a varias facultades da Coruña e Vigo.
“A verdade é que temos moi bo equipo, contamos con xogadores que teñen experiencia no ámbito profesional, como Yurneros e Epsyle”, conta ao DUVI Javier Carrera, alumno de Ciencias do Mar. Os Thunders vense con posibilidades no campionato, aínda que “é moi cedo para dicir que podemos gañar”.
