“Polos seus traballos de investigación e innovación relacionados coa Xestión de Datos, así como polas súas iniciativas nos campos da transferencia de coñecemento en relación con empresas e institucións públicas, así como a creación de empresas de base tecnolóxica”. Nisto se baseou a decisión do xurado dos Premios de Investigación Científica Informática de España e a Fundación BBVA para entregar un dos Premios Nacionais de Informática á catedrática da Universidade da Coruña Nieves Rodríguez Brisaboa.
Deste xeito, a universidade coruñesa recibe por segundo ano consecutivo este galardón, despois do acadado en 2018 por Ramón Doallo, nunha edición na que tamén foi premiado, na categoría de Novos Investigadores o tamén informático da UDC David Vilares. Rodríguez Brisaboa foi recoñecida na modalidade Ángela Ruiz Robles, que leva o nome da mestra ferrolá que inventou un antecedente do libro electrónico.
Nieves Rodríguez Brisaboa é licenciada en Psicoloxía pola Universidad Complutense de Madrid (1979) e doutora nesta mesma especialidade pola USC (1993). Entre 1979 e 1987 foi profesora de Educación Especial e de EXB, unha etapa na que tamén puxo en marcha un pequeno centro de esta especialidade ligado a un colexio concertado. E mentres finalizaba o doutoramento en Psicoloxía, licenciouse en Informática pola Universidade da Coruña, onde se doutorou en 1997. Desde 2007 é catedrática da área de Linguaxes e Sistemas Informáticos na UDC.
En 1991 incorporouse á UDC, institución á que segue vinculada. En 1996 creou o Laboratorio de Bases de Datos (LBD) que dirixe desde entón e que foi catalogado como como grupo de investigación de excelencia pola Xunta de Galicia. Entre outros resultados deste grupo destaca a implementación dun prototipo de ferramenta para comercio electrónico, así como outros resultados no marco das bibliotecas dixitais e dos sistemas de información xeográfica. Algúns dos resultados de investigación deste grupo transferíronse á industria a través dunha spin off. A catedrática ten unha longa traxectoria como investigadora, con sete libros, 88 artigos científicos e 81 proxectos de I+D+i, ademais de participar en tres patentes de investigación.
Rodríguez Brisaboa tamén pertence á Asociación de Mulleres Investigadoras e Tecnólogas (AMIT) e ten participado en actividades e iniciativas para fomentar a participación das mozas e mulleres nas titulacións relacionadas coa informática, unha das que posúe maior fenda de xénero.
