Conta Carlos Pereiro, o xoven xornalista que puxo en marcha a revista Morcego, que “nos medios xeralistas é complicado que a actualidade dos videoxogos teña cabida; só se fala dalgún lanzamento excepcional e, moitas veces, por sucesos desagradables que serven para desacreditar o sector”. Esta reflexión foi unha das razóns que o levou a sacar adiante o proxecto de Morcego, o primeiro portal que aborda en galego esta industria. Un sector que, movendo a nivel mundial máis cartos ca o cine ou a música, ten moito menos espazo na maioría dos medios, e é moitas veces criticada.
“É moi complicado que a actualidade dos videoxogos teña cabida nos medios xeralistas”, di Pereiro
A idea de Pereiro comezou a desenvolverse hai uns meses, despois de ter colaborado xa con outros medios escribindo sobre este asunto. Despois da posta a punto, Morcego saía á luz a comezos de setembro, e conta coa colaboración do tamén xornalista Brais Capelán. “Queremos informar co frecuencia sobre todo o que se move arredor dos videoxogos dun xeito veraz, ameno e desde diferentes perspectivas”, explica. Así, Morcego ofrece seccións como ‘Análises’, na que se debullan as últimas novidades do mercado, reportaxes que afontan en diferentes aspectos do sector, artigos de opinión, a ‘Zona retro’, na que se bota a vista cara o tempo dos primeiros videoxogos, e tamén contará coa súa propia sección de ‘eSports‘, competicións a través da rede que nos últimos anos experimentaron un importante auxe.
Os videoxogos en Galicia
Morcego tamén mirará cara o traballo que se fai en Galicia. Segundo adianta Carlos Pereiro, será sobre todo a través da sección de entrevistas, “con conversas longas e a fondo cos referentes do sector que traballan desde aquí. Estanse facendo cousas moi interesantes, e hai proxectos e empresas que son xa referencia a nivel estatal”.
O nome da revista é tamén unha declaración de intencións. “Quería buscar un nome que soase ben, e na nosa lingua, para afastarnos do que moitas veces se adoita facer, buscando termos en inglés para os que hai un equivalente en galego”. E o morcego parécese, pola súa forma, a “un mando da Play Station ou da XBox“.
Neste senso, Pereiro sinala que Morcego pode ser un paso máis para dar a coñecer á sociedade galega a realidade que hai detrás afeccionados aos videoxogos. “A xente adoita vernos como sedentarios ou frikis, e mesmo ás veces vincúlanse as comportamentos violentos, cando é algo totalmente falso. Por desgraza, a violencia está en moitos máis lugares que nos videoxogos. Ademais, son unha fonte de cultura como calquera outra, coma o cine, ou coma ler un libro, e non só a consomen mozos, senón que cada vez hai máis adultos”. Do mesmo xeito, sinala Carlos Pereiro, “os videoxogos poden ser tamén unha fonte de valores; no Final Fantasy, por exemplo, está a constante loita entre o ben e o mal, a importancia da amizade e o compañeirismo”.
Nestes primeiros días, a acollida do proxecto está sendo boa. “Estamos tendo un alcance importante para ir comezando; e sobre todo, o bo é que a xente nos da a noraboa e as grazas polas redes e pola rúa, agradecen que saia adiante un proxecto así”, conclúe Pereiro.
