No ano 2004 deu comezo o certame European Satellite Navigation Competition(ESNC), máis coñecido por Galileo Masters, un concurso que busca as mellores ideas para o desenvolvemento de aplicacións de navegación por satélite. Está organizado pola Axencia Espacial Europea (ESA), o Centro Aeroespacial Alemán e o Ministerio alemán de Transporte e Infraestructuras Dixitais.
Promóvese en diferentes rexións europeas en colaboración con socios locais e, dende o 2015, tamén en Galicia coa participación da Universidade de Vigo e a Zona Franca. A edición deste ano xa ten aberto o prazo de presentación de candidaturas e que finalizará o 30 de xuño. A xuntanza internacional de avaliación terá lugar en setembro e a cerimonia de entrega de galardóns no mes de outubro.
O certame impulsado pola ESA reparte un millón de euros en premios
O gañador rexional galego obterá un ano de incubación nun dos parques empresariais do Consorcio da Zona Franca de Vigo, incluíndo a asistencia no desenvolvemento do produto, acceso a expertos, servizos administrativos e xerais, coaching de negocios, consultoría, avaliación e formación, estudos de mercado e orientación económica. Ademáis deste premio, os participantes poden optar a seis galardóns internacionais e repartiranse máis de 1 millón de euros en premios. O gañador terá a oportunidade de viaxar de balde á cerimonia internacional de entrega de premios.
O obxectivo na fase galega do ESNC é buscar os mellores servizos, produtos e innovacións que utilicen a navegación por satélite na vida cotiá. Francisco Javier Díaz-Otero, docente e investigador do Departamento de Teoría do Sinal e Comunicacións da Universidade de Vigo e coordinador rexional do concurso, anima a estudantes e investigadores a participar, xa que arredor deste certame existe unha rede europea de 250 socios académicos e empresariais e máis de 10.000 comunicacións enviadas a medios, empresas e axentes relacionados coa navegación vía satélite en toda Europa. “A visibilidade e promoción dos gañadores fai que o 60% das ideas rexionais gañadoras acaben incubando con éxito a súa idea e converténdose nunha pequena ou mediana empresa de éxito”.
