Un equipo da Universidade de Vigo (UVigo) lidera un proxecto para detectar contaminantes en augas termais a través da intelixencia artificial. A iniciativa, denominada Aquapred, tamén conta coa participación de entidades de España, Portugal e Francia. Segundo os investigadores, o sistema realizará “un control preventivo automático sobre os elementos de tratamento da auga que non afecta ás súas propiedades medicinais”. Así mesmo, desenvolverase un modelo de deep learning para predicir a posibilidade de aparición de contaminantes como a lexionela ou a Escherichia coli nas augas termais.
Así o explicaron os responsables de Aquapred na presentación do proxecto, que se celebrou esta semana no Balneario Termal de Laias, en Ourense. Segundo explicaron dende o Departamento de Física Aplicada da UVigo, dende onde lideran o proxecto, Aquapred é multiterritorial, multidisciplinario e interdisciplinario de física, medicina, farmacia, química, bioloxía e informática e está enfocado á monitorización e control da auga termal e mineromedicinal dos balnearios. Tamén, a predición de contaminantes baseándose na dixitalización dos datos en tempo real dos parámetros fundamentais da auga mineromedicinal e a análise continua destes datos por un sistema de intelixencia artificial.
Segundo explican os promotores da iniciativa, que conta cun orzamento de 1,8 millóns de euros, trátase de “aplicar tecnoloxías punteiras ao control e xestión das augas mineromedicinais nos balnearios termais do espazo Sudoe (sudoeste europeo), co triplo obxectivo de minimizar a posibilidade de presencia de contaminantes maximizando as propiedades medicinais das augas, incrementar a base científica sobre o comportamento das augas mineromedicinais e xerar un produto exportable a todos os balnearios do mundo”.
Podes ler a noticia completa do DUVI na seguinte ligazón.
