Onde está o Marumasat 3? É a pregunta que se fan desde onte os centos de alumnos dos institutos Maruxa Mallo de Ordes, Marco Camballón de Vila de Cruces, Miraflores de Oleiros e Xelmírez de Santiago, que participaron no lanzamento da terceira sonda da NOSA, a Axencia Espacial Galega.
“A bordo había catro dispositivos de seguimento – explica Xosé Díaz, profesor de Matemáticas do IES Marco Camballón, un dos participantes no proxecto -, unha radiosonda, un GPS, un teléfono móbil e unha ferramenta de rastrexo para aves. Cando a cápsula estaba a 13.700 metros de altura, a radiosonda deixou de transmitir de forma abrupta”.
Perdemos conexión por radio con #marumasat3.
Os outros dispositivos de localización non están funcionando.SITUACIÓN CRÍTICA
— Axencia NOSA (@MarumaSAT) 7 de mayo de 2018
As previsións realizadas na mañá de onte apuntaban que os ventos do nordés empurrarían á sonda cara a zona da serra de Outes, polo que é posible que alí tomase terra. Segundo os cálculos do tempo de voo, estímase que a cápsula chegou a ascender ata os 34 quilómetros de altura antes de comezar a descender. Grazas ao sinal emitido pola ferramenta de rastrexo, o equipo da NOSA puido constatar que a sonda seguía voando no curso previsto. Pero antes de tomar terra, todo se complicou.
“Posiblemente caeu nunha zona complicada, porque perdemos a sinal e o GPS tampouco dá cobertura”, explica Xosé Díaz. Non se descarta que caera no mar. Onte pola tarde, unha caravana de rescate percorreu varios puntos do concello de Outes para intentar localizar a sonda, pero tiveron que suspender a busca ante a ausencia de resultados. Ante esta situación, a NOSA está facendo un chamamento a través das redes sociais, pedindo a colaboración cidadá para poder recuperar o Marumasat 3.
Contacto:
IES Maruxa Mallo: 881 88 08 69.
IES Marco Camballón: 886 15 17 31.
IES Miraflores: 981 63 16 15
Correo electrónico: nosaaxenciaespacialgalega@gmail.com
No lanzamento, que se realizou o luns ao mediodía desde o patio do IES Maruxa Mallo, estiveron presentes, ademais da comunidade educativa dos centros implicados no desenvolvemento da sonda, o alcalde de Ordes, José Luis Martínez, e varios concelleiros, así como o delegado territorial da Xunta, Ovidio Rodeiro, o secretario xeral de Política Lingüística, Valentín García, e o catedrático de Electromagnetismo da USC e divulgador científico Jorge Mira.
