Black Hornet, a vespa negra. Un dispositivo aéreo non tripulado, do tamaño dunha bolboreta, está sendo utilizado desde hai anos por algúns dos exércitos máis poderosos do planeta. Como en moitas ocasións anteriores, as investigacións vinculadas ao eido militar están á vangarda da tecnoloxía. E o do Black Hornet é un novo exemplo.
O Ministerio de Defensa estuda incorporar as súas operacións este dron minúsculo, fabricado pola empresa norueguesa FLIR, que pode gravar vídeo e son sen ser detectado. Porque mide apenas 10 centímetros de longo, pesa só 18 gramos, ten unha autonomía de voo de 25 minutos e pode transmitir datos en directo desde máis de 1,5 quilómetros de distancia.
Segundo informan varios medios especializados en Defensa, o Ministerio español leva tempo realizando probas e clases de formación de cara á posible compra dalgunhas unidades de Black Hornet. Deste xeito, o exército español tomou nota da experiencia dos militares británicos en zonas de conflito, como Afganistán, onde levan xa varios anos valéndose do mini dron para operacións de alto risco.
O Black Hornet pode controlarse desde un sistema remoto, cunha pantalla do tamaño dunha ‘tablet’ coa que se pode ver en tempo real a gravación realizada polo mini dron. A través deste sistema, pode ser enviado para voar ata un punto determinado – grazas ao GPS incorporado -, volver a un lugar tamén programado. Do mesmo xeito, a súa tecnoloxía permítelle reprogramarse no caso de atopar obstáculos imprevistos. Mais os seus usos son diversos: debido ás súas características, tamén podería empregarse en complicadas misións de rescate, vixilancia de instalacións nucleares ou plantas químicas.
Eu traduciríao como Abellón negro.