Atopan a Marumasat 3 en Negreira

Acabou a incerteza e os centos de participantes no proxecto do Marumasat 3, a última sonda da Axencia Espacial Galega, a NOSA, respiran aliviados. Seis días despois de que perderan contacto con ela, tras realizar o despegue no IES Maruxa Mallo, en Ordes, un alumno de 3º de ESO deste instituto atopou na tarde do sábado a cápsula preto de Negreira.

Xa sabedes o que significa isto: APARECEU A MARUMASAT III. Aí está na foto Rafa, alumno de 3° da ESO do Maruxa Mallo, no momento de atopala. A foto faríalla o pai, a nai… Son uns fenómenos… atopárona por onde estaba previsto inicialmente que aterrase, pero moi lonxe de onde a estabamos buscando agora #marumasat3 #marumasat2018 #axenciaespacialescolargalega #axenciaNOSA Tamén participou no rescate a xente da Sociedade Galega de Cetrería

A post shared by NOSA axencia espacial galega (@marumasat) on May 12, 2018 at 10:41am PDT

Así o comunicaba esta tarde a NOSA. A zona é “moi próxima ao punto de aterraxe previsto calculado o día do lanzamento”. Engaden que “parece que está en bo estado, e a aterraxe foi segundo o previsto. O pasado luns, ao perder contacto coa Marumasat 3 cando voaba a máis de 13.000 metros de altura, o equipo valorou a posibilidade de que se desviara da súa traxectoria e acabara caendo na zona de Outes. Esta mesma tarde, segundo os cálculos, decidiran ampliar a busca a Muros e Carnota.

Publicidade

Con todo, e unha vez atopada a Marumasat 3, a satisfacción vai ser notoria entre os centros participantes na iniciativa: Maruxa Mallo de Ordes, Marco Camballón de Vila de Cruces, Miraflores de Oleiros e Xelmírez de Santiago. Agora é o momento de analizar os datos recollidos pola cápsula, que se cre que ascendeu ata os 35 quilómetros de altura. E está por ver se tamén eclosionou o ovo de abella que levaba a bordo.