Xoves 28 Marzo 2024

Aprender a crear videoxogos con só sete anos

Despois de estar na Coruña, os obradoiros de programación de videoxogos con Scratch, organizados polo Colexio de Enxeñaría Técnica en Informática de Galicia coa colaboración da Amtega, chegan esta fin de semana a Vigo e Ourense. Escolares destas dúas cidades, con idades comprendidas entre os 7 e os 15 anos acompañados polos seus pais ou nais, participarán o venres 7 (Vigo) e o sábado 8 (Ourense), nesta actividade organizada co obxectivo de difundir os valores da programación informática na comunidade escolar. As dúas sesións tamén incluirán formación para docentes. O vindeiro día 15, a actividade desprazarase a Santiago de Compostela.

Deste xeito, os rapaces e rapazas poderán achegarse á programación informática a través dos cursos de Scratch promovidos pola entidade colexial. A iniciativa, apuntan, ten o obxectivo de ampliar progresivamente o número de escolares de Galicia que acceden “de forma lúdica e divertida ao coñecemento da programación informática como ferramenta didáctica, tomando conciencia da súa potencia como medio de expresión creativa”.

Publicidade

Os asistentes aprenderán co Scratch, unha ferramenta de introdución á programación

O Scratch, sinalan os promotores da iniciativa, é unha ferramenta baseada en pezas encaixables que serven para construír pequenos programas que permiten iniciar ao alumnado na linguaxe de programación dun xeito simple e intuitivo pero eficiente. A participación no taller supón, engaden, tanto para docentes como para escolares a aprendizaxe da utilización de Scratch como factor creativo e motivacional, utilizado con obxectivos didácticos. As sesións terán lugar de 17 a 21 horas, no caso de  Vigo (sede de Afundación), e de  9.30 a 14 horas en Ourense (Escola Superior de Enxeñaría Informática), e están estruturadas en dous niveis que se desenvolverán de xeito simultáneo. Un deles será para rapaces e rapazas, acompañados durante a sesión de pais ou nais, e outro para docentes.

Desde o Colexio de Enxeñaría Técnica en Informática de Galicia salientan a importancia de contar cun maior número de formadores especializados para poder ampliar a oferta formativa de Scratch en Galicia, tendo en conta os bos resultados ofrecidos nas edicións anteriores desta iniciativa. Por este motivo, mentres os escolares aprenderán a programar videoxogos, historias interactivas e “storytelling” no taller previsto para eles, nunha sesión simultánea un grupo de docentes non universitarios adquirirá os coñecementos necesarios para intervir como monitores en futuros eventos relacionados co Scratch. A inscrición neste curso é de balde ata esgotamento de prazas.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Cinco libros para agasallar ciencia este Nadal

Unha listaxe con opcións para adultos e nenos que mostra o mundo científico e a súa historia en lingua galega

A eternidade por fin comeza un luns

Artigo gañador da VI edición do IGFAE C3, o concurso de comunicación científica do Instituto Galego de Física de Altas Enerxías

A falsa endemia de malaria e outros intentos para desecar a lagoa de Antela

A partir do século XVIII a zona húmida foi considerada inimiga da agricultura. Os veciños intentaron evitar o desaugamento das terras que utilizaban para o pastoreo

Altofalantes da lingua e da ciencia

Estimados colegas e amigos de Gciencia: Antes de nada, gustaríame darvos os...