A firma viguesa Optare Solutions participará no proxecto Sonata, da Unión Europea, para implementar os servizos de telecomunicacións 5G, con máis velocidade e prestacións que o actual 4G.

Luis Alves, xerente da Optare Solutions, saliente que son a única peme española que participa no proxecto, despois de gañar un concurso público da Unión Europea. Comezarán a desenvolver o seu traballo nas vindeiras semanas, despois de reunirse en Alemaña coas compañías colaboradoras. Este consorcio internacional está formado por multinacionais da talla de Telefónica, British Telecom, Alcatel ou Atos.

A tecnoloxía 5G facilitará as comunicacións entre persoas e a conexión entre os dispositivos. Tamén reducirá os tempos de espera. Prevese, por exemplo, que se multiplique por mil a capacidade das redes inalámbricas actuais. O consorcio que traballa no proxecto Sonata ten catro anos para desenvolver unha plataforma de demostración que sirva de base para implantar esta tecnoloxía en Europa a partir do ano 2021.

As implicacións deste proxecto son moi importantes a nivel global, apunta o xerente nunha entrevista na Voz de Galicia. Optare colaborará de preto na creación dos novos estándares para este tipo de telecomunicacións. Isto significa que calquera empresa que se desenvolva unha tecnoloxía 5G a posteriori deberá seguir o modelo marcado polas empresas do consorcio.

Optare Solutions é unha consultoría tecnoloxía fundada no ano 2008. O último informe Ardán recolle unha facturación de máis de tres millóns de euros. Ten 64 empregados en España e 6 na súa filial Mexicana. A maior parte deles son enxeñeiros de menos de 30 anos. O crecemento da compañía nos últimos anos levoulles a instalarse tamén en Madrid. Entre os seus clientes están IBM, Vodafone, R, Tele2, Ono ou Jazztel.