O propósito do Acelerador de Transferencia da USC é levar a cabo as accións necesarias para cubrir a fenda entre os resultados do que tipicamente se considera un proxecto de investigación e un coñecemento o suficientemente maduro para que resulte de interese para unha empresa ou outro axente externo, co obxectivo de aumentar as posibilidades de transferencia e polo tanto o seu valor. Con esta filosofía, o Acelerador de Transferencia mantén aberto ata o 9 de setembro o prazo para presentar propostas ao programa.
Promovido pola Área de Valorización, Transferencia e Emprendemento da USC (AVTE), o obxectivo do Acelerador, é avanzar no proceso de maduración de resultados de investigación, facilitando a súa transferencia ao entorno social e económico seguindo a práctica doutros referentes nacionais e internacionais. É un programa aberto aos Grupos de Investigación de todas as áreas de coñecemento que teñan identificado algún resultado de investigación con potencial de transferencia.
Para ser seleccionados polo Acelerador de Transferencia, son condicións esenciais que os proxectos identifiquen claramente a fenda existentes entre o resultados e o mercado, así como ter o compromiso dunha empresa para que, no caso de que os resultados obtidos no Acelerador sexan positivos, continúe co proceso de desenvolvemento do produto e/ou comercialización. Os proxectos contarán dende o primeiro momento co asesoramento do persoal técnico da AVTE e o financiamento podería oscilar entre 10.000 e 40.000 euros, durante un período de entre 3 e 9 meses.
