Un ano é o que lle resta á escudaría Uvigo Motorsport para converter o seu deseño dun monopraza de competición nunha realidade. O equipo, formado por estudantes da Escola de Enxeñería Industrial participa na competición automobilística universitaria Formula Student e en 2015 deberán poñer a rodar o seu coche competindo con estudantes de enxeñaría de diferentes universidades do mundo. Mentres traballan no deseño e avanzan na captación de patrocinios, esta fin de semana os seis membros fundadores do equipo desprázanse ao circuíto de Silverstone para presenciar a competición de 2014, na que participan preto de 3000 estudantes de 38 países, segundo informa o DUVI.
Rogelio Dios, Mikel Estraviz, Marcos Fernández, Alejandro Iglesias, Josué Nanín e David González son os artífices desta aventura viguesa na maior competición universitaria do mundo de construción de monoprazas. Formula Student reta ás universidades de todo o mundo para deseñar, construír e competir cun coche de carreiras nun só ano. Este é o proceso no que se atopa agora mergullado o equipo vigués. En 2015 o seu monopraza será avaliado atendendo á súa velocidade, aceleración e resistencia, mentres que os equipos son tamén valorados tendo en conta o deseño, o cálculo de custes e as capacidades de negocio. A proba de 2014 serviralles como primeira toma de contacto coa competición, xa que dende o venres e ata o luns, como explica David González, team leader do equipo, “viviremos dende dentro a experiencia da competición da que formaremos parte o ano que ven”.
Nestes días o seu obxectivo é aprender todo o posible “sobre a dinámica do evento e a realización das probas, ademais de consolidar a nosa internacionalización presentándonos ao resto de equipos europeos”. A pesar de levar xa varios meses traballando arreo neste proxecto, recoñecen que “pisar Silverstone é algo incrible para todos; vendo esta fin de semana a carreira de Formula 1 en televisión, non acabábamos de crernos que en tan só cinco días estaríamos pisando eses mesmos boxes”.
Tres mil estudantes
Nesta proba participan preto de 3.000 estudantes de países de todo o mundo e, de feito, nesta edición 2014, darán a benvida por primeira vez a un equipo de China. Esta edición é tamén na que participan máis mulleres, 280. Entre os que son considerados os mellores enxeñeiros e enxeñeiras máis prometedores sairá o mellor equipo de Formula Student 2014. 250 xuíces voluntarios do mundo dos deportes de motor e da industria da enxeñaría en xeral ocuparanse de valorar os coches e os equipos. Ademais, o evento contará coa presenza de destacados persoeiros do mundo do motor como Paddy Lowe, director executivo de Mercedes AMG Petronas F1; o director técnico de Caterham, Mike Gascoyne ou Willem Toet, xefe de aerodinámica en Sauber F1.
A escudaría Uvigo Motorsport é a primeira que se crea na Universidade de Vigo para participar en Formula Student. O seu monopraza está en proceso de deseño e o equipo en proceso de ampliación. Os seis estudantes fundadores veñen de seleccionar oito novos membros que, como explica David González, “supoñen unha fonte de enerxía fresca coa que esperamos duplicar o noso pulo, sen dúbida un bo golpe de motivación para afrontar con ganas o traballo este verán”. Así, en total conforman a escudaría 14 estudantes das diferentes titulacións e ramas da Escola de Enxeñería Industrial. Explica o seu team leader que actualmente “están completamente entregados á fase de deseño, onde van tomando forma esas pequenas ideas que marcan a diferenza” e explica que xa adquiriron o grupo motopropulsor e parte da electrónica que empregarán; “ilusiona poder ver por fin a nosa enxeñaría en algo material”.
Optimistas cara ó resultado
Outro dos retos desta competición é a vertente empresarial, xa que deben acadar o financiamento preciso para facer realidade o monopraza. Para iso traballan en buscar patrocinadores, algo co que son optimistas, “aínda que todo comezo é moi duro”. Pero o esforzo comeza a dar froito e teñen acordado o patrocinio dunha importante empresa de automoción e están traballando, adiantan, noutro cunha notable empresa do sector en Vigo. González recoñece que aínda resta “moito camiño por percorrer e agardamos continuar á volta da viaxe a Silverstone, xa que non alcanzamos a cifra suficiente para seguir coa fabricación en novembro”.
Esta experiencia, ademais dunha afección para todos eles, é un xeito de ver a enxeñaría convertida en algo real, de comprobar a aplicación práctica dos seus estudos. Pero tamén recoñecen que é un reto como persoas, porque “ademais da profundidade en coñecementos de enxeñaría, tivemos que afrontar numerosos retos e situacións difíciles das que sempre saímos exitosos grazas ao traballo en equipo”. Por outra banda, tamén implica un esforzo extra compatibilizar a construción do monopraza cos estudos e os exames pero, a pesar de ter sido unha etapa extremadamente dura, permitiulles tamén ver que “con ilusión e compromiso todo pode saír adiante”.
