Cinco meses despois da constitución da súa fundación, o Centro de Innovación Aeroespacial, Cinae, xa dispón dun espazo para desenvolver a súa actividade. Coa Universidade de Vigo e o Consorcio da Zona Franca como membros fundadores e a participación no seu padroado das empresas e entidades privadas Airbus, Consorcio Aeronaútico Gallego (CAG), Deltavigo e a Unión de Empresas Gallegas de Aeronáutica (Udega), este “protocentro tecnolóxico”, chamado a convertese no principal foco de innovación e desenvolvemento do noroeste peninsular para o sector aeroespacial, conta desde hoxe cun lugar propio no Edificio Tecnolóxico Aeroespacial de Porto do Molle en Nigrán. No inmoble de máis de 6000 metros cadrados, promovido por Zona Franca e o Instituto Cameral para la Creación y Desarrollo de la Empresa, Incyde, o Centro de Innovación Aeroespacial, que será o único de Galicia coa especificidade que precisan os sectores aeronáutico e aeroespacial, compartirá espazo cun viveiro de empresas tecnolóxicas, así como con empresas privadas.
O acto de inauguración do Edificio Tecnolóxico Aeroespacial, que estivo presidido polo titular da Xunta de Galicia, Alberto Núñez Feijóo, e no que se deron cita numerosos representantes do sector aeroespacial, así como de entidades públicas e privadas, comezou cun recordatorio por parte da delegada do Estado no Consorcio da Zona Franca, Teresa Pedrosa, para o comisionado do VigoTecnolóxico e docente e investigador da Universidade de Vigo, José Antonio Vilán, que continúa a súa recuperación tras sufrir un grave accidente cando circulaba en bicicleta por unha estrada de A Guarda. “El, xunto ao seu equipo e ao tamén investigador da Universidade de Vigo Fernando Aguado, é a alma mater deste proxecto. Necesitámolo aquí”, dixo Pedrosa ao inicio do acto de inauguración do edificio, que ten capacidade para máis de 300 investigadores e investigadoras.
Javier Collado, director xeral da Fundación Incyde foi o primeiro en tomar a palabra para destacar que “este proxecto froito da unión de todos non é o final dunha obra, senón o inicio dun proxecto”. A continuación, o reitor da Universidade de Vigo e presidente de la Fundación Cinae, Salustiano Mato, amosou a súa disposición a traballar para encher de talento o novo edificio, que considera supón unha grande oportunidade para Cinae “que quere achegar músculo ao incipiente sector aeroespacial galego”. Mato, que agradeceu a implicación de Airbus no proxecto, asegurou que a Universidade “quere ser motor e alimentar este centro e as súas incubadoras con iniciativas como as que vimos desenvolvendo”, contando coa colaboración de entidades de referencia como a Axencia Espacial Europea.
O centro de Zona Franca e UVigo ten capacidade para máis de 300 investigadores
O presidente da Xunta de Galicia foi o encargado de pechar o acto de inauguración do edificio, no que tamén tomaron a palabra os alcaldes de Vigo, na súa condición de presidente do Pleno do Consorcio da Zona Franca, Abel Caballero e o de Nigrán, Juan A. González, e a subsecretaria do Ministerio de Hacienda y Administraciones Públicas, Pilar Platero. Caballero amosou a súa satisfacción por un proxecto global que amosa “que estamos nun territorio no que somos quen de facer calquera cousa”, mentres que Juan A. González asegurou que “hoxe é un día de festa para Nigrán”, ao tempo que augurou “mil primaveras máis para o polígono de Porto do Molle”. Pola súa banda, Pilar Platero incidiu na importancia da fusión público-privada para desenvolver iniciativas coma esta que asegurou “é unha realidade e non un proxecto”.
O presidente da Xunta, que comezou o seu discurso apuntando a incompatibilidade que existe entre a innovación e o cortoplacismo e a improvisación, insistiu na necesidade de que as administracións xeren confianza e un ecosistema innovador, no que ademais de reter e recuperar o talento investigador perdido, se reforcen os centros universitarios e tecnolóxicos. Neste sentido, Núñez Feijóo, destacou que “a Universidade de Vigo plantexou de xeito intelixente o Grao en Enxeñaría Aeroespacial que será impartido no campus de Ourense”, unha titulación que o presidente da Xunta considera unha peza máis no grupo de centros neurálxicos no proceso de construción dun novo sector económico, o aeroespacial, e que completan Nigrán, Vigo e As Rozas. O presidente da Xunta reiterou a aposta da súa administración por facer de Galicia un referente europeo no ámbito aeroespacial, que xerará emprego cualificado, ademais de exercer un potente efecto de arrastre noutros sectores. “Galicia ten a ocasión de construír un novo sector económico”, dixo Feijóo, que parafraseando ao Nóbel de Literatura André Gide asegurou que “hai que afastarse da costa para facer máis cousas”.
