Mércores 28 Febreiro 2024

Unha proteína do hipotálamo podería reducir a obesidade e a diabete-2

Un traballo publicado por investigadores do grupo NeurObesidad da Universidade de Santiago de Compostela podería abrir a porta á utilización de novas dianas terapéuticas na loita contra a obesidade. Neste estudo, coordinado pola científica Cristina Contreras e testado en ratas con obesidade, descubriuse un novo mecanismo molecular que demostra que o aumento da proteína chaperona GRP78, tamén coñecida como BiP, consegue que ditas ratas adelgacen sen deixar de comer, ao tempo que se diminúe tamén a diabete tipo 2 asociada ao sobrepeso. Os resultados acaban de ser publicados na revista Diabetes, e ten como primeiros asinantes a Cristina Contreras e ao estudante de doutoramento Ismael González.

Para comprender a investigación é importante a diferenciación entre a graxa branca e a parda. A branca acumula un tecido adiposo como se fora un depósito de enerxía, mentres que a parda funciona como unha estufa, queimando a propia graxa para producir calor e manter a temperatura corporal, segundo explican desde a USC. Os investigadores parten da idea de que un dos mecanismos que producen a obesidade é o mal funcionamento da graxa parda, xa que se diminúe o gasto calórico ao tempo que se incrementa a masa corporal, polo que o tecido adiposo branco predomina sobre o pardo.

Publicidade

Temperatura da graxa parda nunha rata delgada (esq.), nunha rata obesa (centro) e nunha rata obesa tratada con BiP (der.).
Temperatura da graxa parda nunha rata delgada (esq.), nunha rata obesa (centro) e nunha rata obesa tratada con BiP (der.).

Así, o equipo liderado por Cristina Contreras demostrou que ao aumentar a presenza da proteína BiP no hipotálamo das ratas obesas conséguese transformar a graxa branca en parda. Este proceso, coñecido como browning, provoca a redución de peso nestes animais. Segundo explica Contreras, “a inactivación do tecido adiposo pardo durante a obesidade dificulta a ‘queima’ de graxas e a disipación de calor, polo que ao conseguir cambiar a graxa mala (a branca) pola boa, estaremos en disposición de reverter a obesidade”.

A obesidade e a diabete producen unha alteración no procesado das proteínas no hipotálamo, que é a zona do cerebro encargada de regular o estado enerxético do organismo. Este fenómeno, coñecido como estrés do retículo endoplasmático, conseguiu ser reducido polos investigadores da USC. Observaron “que non só se reactiva o tecido adiposo pardo senón que ademais a graxa mala convértese en boa, pasando de acumular graxa a queimala para producir calor”, segundo sinala Cristina Conteras.

Este achado “permitirá identificar novas dianas terapéuticas para o tratamento da obesidade e a síndrome metabólica, que actualmente están alcanzando proporcións pandémicas nas sociedades occidentalizadas”, apunta a investigadora. Este equipo da USC xa realizou estudos previos sobre a obesidade, liderados polo científico Miguel López financiados co programa de excelencia europea Starting Grant.

 

 

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Identificada unha proteína esencial na regulación da obesidade

Un estudo do CSIC descobre que Dido1 ten unha función clave no desenvolvemento do tecido adiposo

Un equipo galego demostra que o estómago é capaz de regular o apetito e o peso corporal

O estudo do IDIS revela cambios substanciais na produción da proteína GDF15 a nivel gástrico vinculados coa obesidade, a idade e o xénero

Non só engorda o que comemos: estes compostos químicos fan que aumentes de peso

Presentes en diferentes substancias e no ambiente, certos compostos químicos son capaces de alterar o funcionamento do noso organismo

Lugo é a provincia do Estado con máis persoas obesas

Varios estudos revelan que Galicia é a segunda comunidade con máis prevalencia de sobrepeso entre a poboación adulta