A Dirección Xeral de Asistencia Sanitaria do Sergas vén de actualizar a situación dos servizos de urxencias dos centros hospitalarios e de atención primaria. Segundo os datos que traladan, o número de casos actuais de gripe é de 1.678, o que supón unha baixada de 141 respecto á xornada anterior. No que respecta aos ingresos, hai 895 persoas hospitalizadas por gripe; nove menos que o día anterior. De todos eles, 42 pacientes están en UCI. O Sergas tamén indica que a positividade da gripe é do 33%, o que representa dous puntos menos que na última xornada.
No que respecta aos demais virus respiratorios, o sincitial (VRS) supón 261 casos activos, once menos que na xornada anterior, e con 163 hospitalizados —un menos que o día anterior—. Sinalar que 96 destas persoas hospitalizadas teñen máis de 80 anos. No que atinxe ao número de persoas ingresadas por covid na actualidade é de 181, das que seis permanecen na UCI, catro menos que o día anterior.
Vacinación gripe
Xunto ao anterior, a Xunta xa indicou, o pasado 29 de decembro, o uso da máscara en todos os centros sanitarios e ampliou a campaña de vacinación ata o 12 de xaneiro, xa que vacinarse axuda a evitar complicacións que requiran atención nos servizos de urxencias. No que respecta ás coberturas de vacinación, nas persoas de máis de 80 anos é de xa o 82%; no grupo de maiores de 65 anos é do 73,5%; no de maiores de 60 anos do 67,4%; e nos dos menores de cinco anos do 51%.
Neste días que quedan de altas interaccións sociais, a Consellería de Sanidade quere trasladar á cidadanía unha mensaxe de prudencia e facer uso da máscara en calquera lugar cando a persoa teña síntomas de infección respiratoria.
