Mércores 21 Febreiro 2024

Tecnoloxía galega para diagnosticar o dano do ictus en tempo real

Cada seis minutos, unha persoa morre por mor dun ictus en España. É a segunda causa de mortalidade, a primeira no caso das mulleres. A rapidez na atención médica e o tratamento é clave para evitar mortes e, en segundo plano, posibles secuelas. En Galicia, O Instituto de Investigación Sanitaria de Santiago (IDIS), a traves do Laboratorio de Investigación de Neurociencias Clínicas (Linc) dirixido por José Castillo, enfoca os seus esforzos na loita contra esta doenza.

O último dos seus avances é a creación de LincBiotech, unha empresa spin-off impulsada polo IDIS xunto á empresa Conexiona Telecom, con base en Ourense. Os seus obxectivos principais son sacar ao mercado dúas importantes ferramentas contra o ictus: unha de prognóstico e outra de tratamento.

Publicidade

Unha temperatura por riba de 37º multiplica por 4 o risco de mal prognóstico do ictus

Así, Lincbiotech desenvolverá un software que axudará aos médicos na decisión clínica que cuantifica e mapea a temperatura cerebral a partir dos datos da resonancia magnética realizada aos pacientes de infarto cerebral. Con esta ferramenta, os profesionais sanitarios poderán obter un diagnóstico máis preciso.

E por outra banda, a empresa traballará no desenvolvemento dunha tecnoloxía para inducir unha diminución da temperatura focal nas persoas afectadas polo ictus. Segundo se comprobou a través de modelos experimentais realizados polo Linc, esta técnica é igual de efectiva para o enfermo que a hipotermia sistémica, empregada na actualidade para reducir o dano nun ictus grave.

A temperatura corporal é un parámetro clave para o diagnóstico do ictus. Investigacións do IDIS sinalan que unha temperatura por riba de 37ºC multiplica case por catro o risco de mal prognóstico, que implica morte ou alto grao de discapacidade posterior. Ata o de agora non existían técnicas de medición non invasivas. Na actualidade é preciso someter aos afectados por ictus graves a hipotermias sistémicas, que afectan a todo o corpo, un método que xera posibles complicacións, pois é necesario inducir o coma aos enfermos. Co novo método de hipotermia focal poderase reducir un 10% da mortalidade e as secuelas nun 20%.

Amais, a técnica é aplicable a outras patoloxías, xa que “o aumento da temperatura empeora todas as enfermidades cerebrais, porque cada grado de aumento incrementa un 20% as necesidades metabólicas do cerebro”, explica José Castillo.

“A través da aplicación de atrapadores de glutamato, revertimos o efecto da alta temperatura, xa que un dos mecanismos de incremento de temperatura é o aumento do glutamato”, explica José Castillo.

Presentación

Lincbiotech presentouse este venres na sede do Linc, no Hospital Clínico de Santiago, coa presenza de José Castillo, o director de I+D e proxectos de Conexiona, Carlos Sande, e a xerente da área de Xestión Integrada de Santiago, Eloína Núñez. Posteriormente, visitaron tamén a sede de Conexiona na Tecnópole de San Cibrao das Viñas. Ademais de Castillo, participan no equipo científico os doutores Tomás Sobrino, Francisco Campos e Ramón Iglesias.

Segundo os plans da empresa, agárdase que o software se comercialice en España e Europa a comezos de 2019. O algoritmo xa foi testado en modelos de experimentación, e este ano xa se está traballando no desenvolvemento e validación clínica en humanos.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Por que o cerebro dos vertebrados é tan complexo? A clave está en virus antigos

Uunha secuencia xenética derivada de primitivos retrovirus resulta esencial para producir mielina, a capa que protexe as fibras nerviosas

Un equipo galego demostra que o estómago é capaz de regular o apetito e o peso corporal

O estudo do IDIS revela cambios substanciais na produción da proteína GDF15 a nivel gástrico vinculados coa obesidade, a idade e o xénero

Un equipo galego usa nanopartículas para mellorar o tratamento da fase aguda do ictus

Investigadores do IDIS e da USC reducen os efectos secundarios da única terapia farmacolóxica dispoñible para abordar a enfermidade

Unha técnica biomatemática monitoriza a evolución do dano en accidentes cerebrovasculares

O tecido cortical que aínda mostra actividade nun encefalograma pode estar a sufrir xa a morte irreversible das capas neuronais máis superficiais