Os autores atoparon que o tabaquismo estaba relacionado con formas máis graves da Covid-19.
Os autores atoparon que o tabaquismo estaba relacionado con formas máis graves da Covid-19.

O tabaquismo incrementa na mocidade o risco de ter formas graves de Covid-19

Un estudo realizado nos Estados Unidos destaca que arredor do 30% das persoas entre 18 e 25 anos son vulnerables a complicacións da doenza

A mocidade non protexe ás persoas dunha enfermidade grave. Esta é a principal conclusión dun estudo, realizado por expertos do Hospital Infantil Benioff da Universidade de California, que analizou os numerosos casos de adultos novos infectados co coronavirus nos Estados Unidos.

Os investigadores examinaron os datos extraídos dunha mostra nacional de aproximadamente 8.400 homes e mulleres de 18 a 25 anos de idade e observaron como a vulnerabilidade médica xeral era do 33 % no caso dos homes e do 30 % no das mulleres.

Os datos dos Centros para o Control e a Prevención de Enfermidades (CDC) estadounidenses, que non se incluíron neste estudo, indican que aínda que os pacientes maiores de 65 anos son significativamente máis propensos a ser hospitalizados que os máis novos, a fenda está a reducirse.

Na semana que terminou o 18 de abril, houbo 8,7 hospitalizacións por cada 100.000 habitantes no grupo de 18 a 29 anos, en comparación con 128,3 por cada 100.000 habitantes no caso dos maiores de 65 anos.

Con todo, na semana que terminou o 27 de xuño as cifras foron de 34,7 e 306,7 respectivamente, o que supón un aumento do 299% nas hospitalizacións de adultos novos fronte a un incremento do 139 % nas hospitalizacións de adultos maiores.

Factores de risco

Os investigadores, dirixidos por Sally Adams, determinaron a vulnerabilidade mediante indicadores identificados polos CDC. Estes incluían patoloxías cardíacas, diabetes, asma, condicións inmunolóxicas (como lupus, gota, artrite reumatoide), condicións hepáticas, obesidade e tabaquismo nos 30 días anteriores.

O traballo, publicado no Journal of Adolescent Health, revela como o impacto do tabaquismo superou aos outros riscos menos comúns, xa que o 100% dos fumadores eran vulnerables á Covid-19 grave.

O máis notable entre os seus resultados foi que a vulnerabilidade médica situouse no 16,1% para o 6.741 non fumadores, fronte ao 31,5 % da mostra completa de 8.405 adultos novos, que incluía aos fumadores.

“O tabaquismo está asociado cunha maior probabilidade de progresión de Covid-19, incluíndo unha maior gravidade da enfermidade, admisión na UCI ou morte”, explica Adams. “Fumar pode ter efectos significativos nos adultos novos, que tipicamente teñen baixas taxas para a maioría das enfermidades crónicas”.

A importancia de reducir o tabaquismo

Investigacións recentes tamén mostran que os adultos novos están a comezar a fumar a taxas máis altas que os adolescentes, un cambio respecto das tendencias anteriores. Nos trinta días anteriores, o 10,9% fumara un cigarro, o 4,5% fumara algún produto de tabaco e o 7,2 % fumara un cigarro electrónico.

O número de fumadores, 1.664 ou o 19,8%, foi maior que o número de persoas con asma (8,6%), obesidade (3%) e trastornos inmunolóxicos (2,4%). Ademais, o 1,2% tiña diabetes, o 0,6% unha afección hepática e o 0,5 % unha afección cardíaca.

“O risco de ser médicamente vulnerable a unha enfermidade grave redúcese á metade cando se retira aos fumadores da mostra”, indica Charles Irwin Jr., autor principal. “Os esforzos para reducir o tabaquismo e o uso de cigarros electrónicos entre os adultos novos probablemente diminuirían a súa vulnerabilidade ás enfermidades graves”.

Matices no xénero

Os científicos observaron diferenzas de xénero en cinco indicadores de vulnerabilidade: as mulleres eran máis propensas a ter asma (10% fronte a 7,3%), a ser obesas (3,3% fronte a 2,6 %) e a ter problemas inmunolóxicos (3,2% fronte a 1,6%).

Con todo, unha cantidade significativamente menor de mulleres novas fumaba, o que resultou nunha vulnerabilidade médica xeral de 29,7%, en comparación con 33,3% para os homes novos.


Referencia: Medical Vulnerability of Young Adults to Severe COVID-19 Illness—Data From the National Health Interview Survey (Publicado no Journal of Adolescent Health).

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.