Venres 29 Marzo 2024

Sen inflamación e sen dor: unha nova técnica axiliza a recuperación das hernias de disco

O Parque Tecnolóxico de Galicia acolle este venres unha formación dirixida a traumatólogos e neurocirurxiáns de todo o país

A hernia de disco é unha lesión moi común da columna vertebral, que se produce polo desgaste dos discos que hai entre as vértebras, coa consecuente presión sobre os nervios próximos ou a medula espiñal, o que provoca unha dor intensa. Ata o de agora, para extirpalas seguíase unha técnica bastante agresiva que derivaba nunha recuperación complexa. Agora estase implantando unha nova técnica máis segura que permite ao paciente abandonar o hospital no mesmo día da intervención, sen inflamación e sen dor. Co obxectivo de dala a coñecer entre a comunidade médica, este venres 24 de marzo, o centro de cirurxía experimental do Parque Tecnolóxico de Galicia (Tecnópole) celebra un curso dirixido a traumatólogos e neurocirurxiáns de toda Galicia.

Esta nova técnica de cirurxía endoscópica lumbar require unha incisión mínima, inferior a un centímetro, pola que se introduce unha cánula provista dunha cámara e de todos os aparellos precisos para levar a cabo a operación. “Ofrécese unha imaxe amplificada e de alta resolución da zona, o que permite unha maior delicadeza na manipulación dos tecidos e a extracción completa da hernia, sen danar a estrutura ósea nin a musculatura. É unha técnica máis segura. Desaparecen os riscos para o paciente posto que non hai sangrado nin posibilidades de infección, ao tempo que apenas se tocan as estruturas nerviosas”, explican os doutores Juan Castro Toral e Juan Álvarez de Mon Montoliu, encargados de impartir o curso.

Publicidade

“Desaparecen os riscos para o paciente porque non hai sangrado nin posibilidades de infección”

“Ademais, o paciente pode abandonar o hospital o mesmo día da intervención, sen inflamación e sen dor, polo que non se requiren analxésicos, e en dúas semanas xa pode facer vida normal. E a hernia non volve reproducirse, o que era habitual coas técnicas clásicas”, manifestan os doutores. Tamén salientan que esta técnica permite realizar cirurxías a pacientes con complicacións e que, doutro xeito, sería inviable, por motivos de idade, enfermidades terminais… Isto proporciónalles unha gran melloría na súa calidade de vida. Nos pacientes mozos, evítanse inmobilizacións prolongadas. Por outro lado, agora é posible facer cirurxía en casos nos que ata o de agora non estaba indicado debido á complexidade das técnicas clásicas. “Esta técnica supón unha revolución na cirurxía da columna posto que se pode aplicar para abordar calquera patoloxía lumbar, o que abrangue multitude de doenzas”, aseguran os doutores.

En Galicia, esta técnica xa se está a aplicar con éxito no Hospital San Rafael da Coruña, no que traballan os dous doutores: Castro como xefe de Servizo de Traumatoloxía e Álvarez como especialista en Cirurxía Ortopédica e Traumatoloxía na Unidade de Columna. Levan preto de 200 pacientes intervidos desde finais de 2021, momento no que empezaron a poñela en práctica.  

3 COMENTÁRIOS

  1. Un gran avance da medicina e unha nova esperanza para os milleiros de persoas que padecen problemas da columna. Esperemos que o Servicio Público de Saude pronto aplique esa técnica nos Hospitais. Outra cousa van ser as lista de aspera.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

A empresa galega Primux medrou un 20% no ano 2020

A compañía, con sede na Tecnópole de Ourense, e líder en España na fabricación de dispositivos informáticos con sistema operativo Windows

Envita, historias de vida para mellorar o coidado dos maiores

A experiencia na xestión de centros de maiores en varios puntos...

O Agrobiotech Fest reúne en Ourense a 200 empresas e centros de coñecemento

A terceira edición do evento, cun formato renovado, servirá para reunir a representantes dos sectores téxtil, agroalimentario ou biomédico

A Galiciencia, finalista nun premio mundial de Parques Tecnolóxicos

A feira científica que se celebra todos os anos na Tecnópole de Ourense compite con 10 proxectos de varios continentes no certame