Xoves 28 Marzo 2024

Primeiro caso documentado de reinfección polo coronavirus SARS-Cov-2

Un paciente de Hong Kong volve estar infectado despois de viaxar a España este verán, aínda que non desenvolve síntomas

Un hongkonés que regresou de España sería o primeiro reinfectado polo coronavirus que provoca a Covid-19, segundo anunciou a Universidade de Hong Kong. A segunda infección foi asintomática e con capacidade de contaxio, aínda que isto deberá comprobarse co cultivo do virus, aínda en marcha. O achado ten implicacións no desenvolvemento de vacinas e na inmunidade de grupo.

O cidadán hongkonés de 33 anos é o primeiro caso documentado de reinfección por Covid-19 no mundo. O paciente foi dado de alta tras curarse do virus en abril, pero catro meses e medio máis tarde, a principios de agosto, volveu dar positivo nas probas despois de regresar desde España. Un feito relevante é que só tivo síntomas leves a primeira vez e ningún síntoma na segunda ocasión. Ivan Fan-Ngai Hung, un dos autores, declarou á axencia SINC que aínda que fose asintomático, o paciente era contaxioso “xa que a carga viral inicial ao seu regreso de España era bastante elevada (Ct 26)”.

Publicidade

Segundo os autores, o artigo foi aceptado xa pola revista Clinical Infectious Diseases e a súa versión dixital publicarase “moi pronto”, en palabras de Fan-Ngai Hung. A análise das secuencias xenéticas dos virus que infectaron ao paciente en abril e en agosto revelou diferenzas entre eles, explican. O coronavirus que secuenciaron na segunda ocasión coincidía coa cepa circulante en Europa durante xullo e agosto, polo que se trataría dunha nova infección e non de restos da primeira, segundo os investigadores.

De confirmarse, implicaría que a inmunidade pode ser de curta duración despois da infección

De confirmarse, o caso deste home implicaría que “a inmunidade pode ser de curta duración despois dunha infección natural” e “SARS-CoV-2 pode persistir na poboación humana global” como os coronavirus relacionados co arrefriado común, afirman os investigadores.

Que nos di a reinfección sobre a resposta inmunitaria deste e doutros pacientes? “Os anticorpos comezarán a diminuír despois dun certo período, e todos os pacientes recuperados estarán en risco de reinfección”, advirte Fan-Ngai Hung. “Por tanto, a vacinación, o uso das máscaras e o distanciamento social serán necesarios para todos, incluídos os que se recuperaron”, engade.

Motivo de alarma?

Segundo explica a través da súa conta de Twitter a viróloga Akiko Iwasaki, da Escola de Medicina de Yale (EUA), que non participou no estudo, o resultado non debe ser motivo de alarma, senón unha mostra da complexidade do sistema inmunitario. O feito de que a segunda infección fose asintomática indica que, “a pesar de que a inmunidade desenvolvida polo paciente non foi dabondo para bloquear a infección, si o protexeu da enfermidade”, explica.

A posibilidade de que o novo coronavirus provoque reinfeccións pouco tempo despois de superar a enfermidade, é dicir, que a inmunidade xerada polo paciente non sexa de longa duración, é unha das cuestións que máis preocupan aos científicos, xa que ten implicacións na epidemioloxía da Covid-19, na inmunidade de grupo e no desenvolvemento de vacinas contra o virus.

Sobre a fiablilidad deste estudo, Philippe Gautret, que é investigador en VITROME (Vectores, Infeccións Tropicais e Mediterráneas, en francés), amosa as súas dúbidas ata que se publique nunha revista científica. “Mesmo se se publicase en Clinical Infectious Diseases, necesito ler o artigo para comprobar a súa fiabilidade”, alegou en declaracións á axencia SINC. “Clinical Infectious Diseases podería publicar cousas estúpidas como The Lancet ou The NEJM fixeron”, engade. A inxente produción científica sobre o novo coronavirus, alentada pola gravidade da pandemia, está a provocar un altísima taxa de publicacións en revistas especializadas. Entre elas, xa houbo algúns erros, que afortunadamente foron detectados e corrixidos ou retractados.

Antes do caso anunciado hoxe, outros pacientes xa volveran dar positivo na proba PCR tras curarse da Covid-19. Para os casos anteriores, algúns investigadores propuxeron explicacións ás súas supostas reinfeccións non confirmadas: un tempo despois o virus podería perder a súa capacidade de infección e o que revela a proba é a súa mera presenza. Outros inclínanse máis por sospeitar de falsos positivos previos ou dunha baixa presenza de anticorpos.

Pero a pregunta clave segue aí: durante canto tempo estaremos protexidos se pasamos a Covid-19? “Aínda non sabemos que tipo de inmunidade se require para estar protexido fronte á infección de SARS-CoV-2 nin a súa duración”, explicaba a SINC en xuño María Montoya, investigadora do Centro de Investigacións Biolóxicas Margarita Salas (CSIC).

Despois deste novo caso, a viróloga Akiko Iwasaki afirma que, “aínda que é un bo exemplo de como a infección primaria pode previr a enfermidade da infección seguinte, necesitamos máis estudos para entender o abano de posibilidades das reinfeccións”.

1 comentario

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Por que algúns pacientes teñen covid persistente e outros non? Este estudo dá na clave

Un equipo do Hospital Universitario de Zúrich busca mellorar a atención aos doentes con novas estratexias de tratamento

Ascenden a 57 os falecidos por gripe en Galicia

O último informe do Sergas confirma a tendencia á baixa da incidencia nas catro provincias

Por que aumentan as infeccións respiratorias agudas en España?

Estamos xusto no momento do incremento da curva da gripe que este ano coincidiu co Nadal e o aumento dos contactos sociais

Tes gripe ou covid? Estas son as diferenzas

A inmunóloga África González admite que teñen síntomas moi similares pero que se distinguen polo tempo de incubación e a estacionalidade