Aconteceu nunha clínica quiropráctica da cidade brasileira de São Paulo no ano 2021. Unha muller de 48 anos acudiu ao centro sanitario para tratar unha dor persistente de costas. Ao rematar a sesión, a muller comezou a decatarse dunha forte e persistente dor de pescozo e unha debilidade xeneralizada en todo o corpo. Dirixiuse en canto puido ao hospital para que un especialista a tratase. Tras realizárenlle distintas probas, a examinación neurológica revelou que a muller padecía unha tetraplexía con nivel sensorial C5, é dicir, conservaba o control de ombreiros e bíceps, mais non controlaba a man ou o puño.
A seguinte proba, a tomografía computarizada da columna cervical, revelou unha fractura que afectaba ás vértebras C5 e C6. Logo, a resonancia magnética da columna cervical confirmou os peores augurios: unha grave lesión na medula espiñal lesión. Ademais, os facultativos que a trataron no centro sanitario atoparon unha oclusión bilateral da arteria vertebral e mais un infarto agudo do cerebelo. E non queda aí. Os médicos concluíron, nun primeiro momento, que as lesións neurolóxicas relacionadas coa sesión quiropráctica que a paciente recibira horas antes inclúen unha disección da arteria vertebral e unha hernia discal aguda. Agora, dous grupos de investigación dos equipos de médicos dos departamentos de neuroloxía e reumatoloxía da Faculdade de Medicina da Universidade de São Paulo en Brasil veñen de confirmar en cadansúa investigación como lle afectou a esta muller unha mala execución quiropráctica. Ambos publicaron informes de casos sobre esta mesma paciente que resultou ferida despois de someterse a unha manipulación quiropráctica da medula espiñal.
