Desde este mércores, segundo confirma a Consellería de Sanidade, a aplicación Radar Covid está en funcionamento en Galicia. Despois de que o martes 15 se completara a integración no sistema estatal, o Sergas xa ofrece ás persoas que reciben un diagnóstico positivo por Covid-19 a posibilidade de introducir o código na aplicación do seu teléfono móbil, en caso de tela instalada. Deste xeito actívase a alerta para informar aos contactos estreitos dos últimos días e facilitar o rastrexo da enfermidade. Por iso, tal e como insisten as autoridades sanitarias, é preciso que a maior cantidade de persoas instale a aplicación. Ata o momento, a Secretaría de Estado de Digitalización e Inteligencia Artificial informou de que xa se realizaron máis de catro millóns de descargas, pero cómpre que o número sexa maior para garantir un rastrexo máis efectivo.
La @AppRadarCovid supone un método complementario para la búsqueda de contactos de riesgo de contraer una infección por #COVID19 y podría permitir la identificación de contactos no identificados de forma manual.
✔️Con esta aplicación te cuidas y proteges a los demás#AbroHilo pic.twitter.com/hrvVL5IgRm
— Ministerio de Sanidad (@sanidadgob) September 17, 2020
Radar Covid utiliza a conexión de Bluetooth dos dispositivos móbiles para emitir e observar identificadores anónimos doutros terminais, que van mudando co tempo. Cando dous dispositivos permanecen durante 15 minutos a dous metros de distancia ou menos, os identificadores mutuos gárdanse durante 14 días para garantir un correcto rastrexo durante o posible período de transmisión. No caso de que un dos usuarios do dispositivo dese positivo en PCR por Covid-19, tería a posibilidade de notificar a través da ‘app’ un aviso mediante o código recibido por parte das autoridades sanitarias, nunha pantalla semellante á que se ve baixo estas liñas, para enviar alertas aos terminais que estiveron próximos a el.
Pendente da implantación total en galego
Alén da tardanza na implantación en Galicia, que foi unha das últimas comunidades autónomas en integrarse no sistema, Radar Covid segue sen resolver, en parte, outra das reclamacións pendentes das persoas usuarias en territorios con linguas cooficiais: a existencia dunha versión en galego ou euskera.
Aínda que algúns usuarios do sistema operativo iOS (que utilizan os dispositivos de Apple), expuxeron que xa estaba dispoñible en galego, noutros casos as únicas opcións dispoñibles seguen sendo catalán, castelán e inglés. Neste sentido, A Mesa pola Normalización Lingüística reclamou nas últimas semanas que se cumpra co dereito da cidadanía a recibir información na súa lingua propia.
Passcovid
Por agora, as persoas con tarxeta sanitaria do Sergas deberán informar dun posible positivo a través de Radar Covid, aínda que a Xunta avanzou que durante este mes de setembro comezará a estar dispoñible unha ‘app’ complementaria, co nome de Passcovid, a través da cal tamén se poderá introducir o código que os profesionais sanitarios achegarán á persoa que dea positivo nunha proba PCR.
A Administración autonómica, a través da Axencia para a Modernización Tecnolóxica de Galicia (Amtega), desenvolveu unha proba piloto de Passcovid durante o mes de agosto. Aínda que Amtega aclara que non se trata dunha ‘app’ de rastrexo, as persoas que a descarguen poderán, en caso de que chegue a implantarse, recibir información personalizada ” identificar o nivel de risco transmisor da persoa usuaria fronte á Covid-19″ a través de parámetros como as novidades da evolución da pandemia, as zonas de maior risco, os indicadores xerais e por concellos en Galicia. Tamén se contemplaba a opción de que no caso dos establecementos de restauración, a persoa usuaria poida rexistrar a súa presenza a través dun código QR para recibir o aviso en caso dun positivo ou contaxio no mencionado local.
Isto e Orwelliano . Non penso facerlo se tiven positivo