As provincias de Lugo e Ourense teñen un índice de centenarios moi por riba da media do Estado, e sitúanse entre as cinco provincias onde é máis común superar esta idade. A taxa de centenarios de Ourense é de 77,2, con 240 persoas con máis de 100 anos sobre unha poboación total de 311.648 habitantes. Este índice só é superado por Soria (84) e está igualado con Zamora (77,5). Lugo ocupa a quinta posición do Estado, cun índice de 70 puntos e 233 centenarios nunha poboación de 333.574 habitantes.
Fronte aos altos índices de centenarios nas provincias do leste de Galicia, na fachada atlántica as taxas baixan case á metade. En Pontevedra é de 40, mentres que A Coruña só chega ao 31,9.
Os novos datos veñen dun estudo realizado polo Consello Superior de Investigacións Científicas e dirixido por Antonio Abellán, do Grupo de Investigación sobre Envejecimiento. O traballo, titulado Un perfil das personas maiores en España, 2017 Indicadores estadísticos básicos, revela que en Galicia hai un total de 1.208 centenarios. Están repartidos por provincias deste xeito: Pontevedra (377), A Coruña (358), Ourense (240) e Lugo (233).
A esperanza de vida en Galicia está a medrar e xa chega aos 83,04 anos
A esperanza de vida no país medrou nos últimos anos de xeito considerable. En todo o mundo, só España e Xapón alcanzan os 83 anos, un selecto club de élite no que Galicia vén de entrar, cunha esperanza de vida de 83,04 anos, tras subir medio punto (0,42%) no 2014 fronte ao ano 2013 (82,69 anos).
No caso de Galicia, o aumento da esperanza de vida é espectacular nos últimos anos. Os galegos viven hoxe de media 6 anos e 6 meses máis que hai só un cuarto de século. En 1991, a idade media de falecemento eran 76,85 anos fronte aos 83,04 da actualidade.
Como acontece noutras rexións desenvolvidas, en Galicia está a reducirse a gran diferencia entre homes e mulleres. En 1991, elas vivían de media 7,5 nos máis que eles. Vintecinco anos despois, elas viven 6,32 nos máis. E a tendencia é que homes e mulleres galegos vivan os mesmos anos de media. O tabaquismo, a alimentación, os estilos de vida están a igualarse. E semella que este factor é o máis determinante, por riba dalgunha vantaxe xenética vencellada ao sexo. De feito, esta estatística é recente. Porque ata mediados do século XX, eran os homes sempre máis lonxevos, como consecuencia da elevada mortandade consecuencia dos partos.
