A Universidade de Santiago de Compostela anunciou este mércores a creación da Cátedra de Cronicidade, que estará dirixida polo doutor Antonio Pose, profesor titular de Medicina e xefe de servizo de Medicina Interna do CHUS. O vindeiro 13 de decembro celebrarase un acto público de presentación do proxecto no Salón Nobre de Fonseca, que conta co apoio de de Otsuka Pharmaceutical, Baía Software, Daiichi Sankyo e Philips Ibérica. A iniciativa xorde da necesidade que evidencian os datos no sistema sanitario: un 76% das actuacións médicas, tanto en atención primaria como hospitalaria teñen que ver coa cronicidade, un paraugas baixo o que se acubillan ata un 40% dos galegos e galegas que padece unha ou varias enfermidades crónicas. Os datos tamén apuntan que un 4% dos pacientes, crónicos cun ou varios problemas de saúde, consomen ata o 60% dos recursos sanitarios do orzamento médico.
Tal e como explican desde a USC, o propio avance da ciencia médica converte enfermidades antes fatais en crónicas, como sucede con moitos tipos de cancro, a diabetes, ou patoloxías como o VIH. É probable que pronto ocorra o mesmo con enfermidades dexenerativas como o Alzheimer. Isto provoca que a poboación afectada sexa cada vez máis numerosa e de maior idade, o que á súa vez demanda máis atención do sistema. Porque, nestes casos, o coidado e unha boa xestión do paciente substitúe á curación, da que aínda non dispoñemos en moitas enfermidades crónicas.
Así, ante a imposibilidade de curar a doenza en moitos casos, hai que abordar un tratamento eficaz e unha continuidade de coidados. Unha idea sinxela, non tan fácil de trasladar ao sistema sanitario actual, perfeccionista no trato dos enfermos agudos, que aínda require reorganizarse para ofrecer un plan de apoio a este colectivo, tanto no sector saúde como no social. Ante isto, apunta a USC, as facultades de Medicina e Enfermaría deben tamén adaptarse a esta realidade e así poder apoiar ás autoridades sanitarias e sociais a atender este reto.
Ademais da dirección de Antonio Pose, a Cátedra de Cronicidade contará co doutor Rafael Bengoa – senior fellow da Universidade de Harvard, codirector do Institute for Health and Strategy e ex-conselleiro de Saúde do Goberno Vasco-, como asesor técnico. A iniciativa promoverá debates ao redor das posibles medidas a adoptar. Entre elas, o uso das novas tecnoloxías, os cambios de funcións nos profesionais clínicos, o papel crecente do paciente e a integración de coidados.
No acto de presentación da cátedra celebrarase tamén unha mesa redonda na que tomarán parte algúns dos máis destacados profesionais da Medicina en España: a doutora Ruth Beira, presidenta saínte da Sociedade Española de Oncoloxía Médica; o profesor Ángel Carracedo, catedrático de Medicina Legal da USC e director da Fundación Pública Galega de Medicina Xenómica; o doutor Rafael Matesanz, creador e fundador da Organización Nacional de Transplantes; e o doutor Rafael Bengoa. A perspectiva do paciente achegaraa Laura Quintas, presidenta da Asociación Galega de Hemofilia e vogal de COGAMI.