Únete á nosa canle de Whatsapp
Un equipo de científicos galegos lanza un fármaco oral para o tratamento de pacientes covid. O medicamento, que aínda non está comercializado, xa se está a probar en centros de atención primaria de Galicia e Cataluña para loitar contra o coronavirus en doentes con síntomas leves. Dende o Instituto de Investigación Sanitaria de Santiago de Compostela (IDIS), un dos centros participantes no proxecto, recordan que “aínda está en fase de estudo” pero que, de momento, presenta un “potencial prometedor” na inhibición da multiplicación de coronavirus nas células hóspede. De feito, o principal obxectivo deste fármaco é previr a deterioración clínica e as complicacións da infección.
Detrás deste traballo están investigadores do IDIS como Mabel Loza, tamén coordinadora do grupo BioFarma do Centro de Investigación en Medicina Molecular e Enfermidades Crónicas (CiMUS) da Universidade de Santiago de Comspotela (USC). Así mesmo, Manuel Portela, profesor asociado na facultade de Medicina da USC; Irene Zarra, xefa do Servizo de Farmacia do Hospital Clínico de Santiago (CHUS); Daniel Rey, médico de atención primaria; e Plácido Mayán e Azucena Prieto, xefes do Servizo de Urxencias do CHUS e do Hospital do Barbanza respectivamente. Amais disto, o próximo luns 6 de xuño, o IDIS fará a presentación oficial do ensaio clínico en fase II nun acto que se celebrará no propio centro.
Outros antivirais
O novo fármaco oral para tratar a covid terá selo galego pero non será o único do mercado. O primeiro da Unión Europea foi o Paxlovid, que chegou a Galicia a finais de marzo, cando se comezou a administrar entre os doentes. Dito antiviral, da farmacéutica Pfizer, foi recomendado pola Axencia Europea do Medicamento (EMA) despois de que se concluíse que o seu uso mostraba unha redución moi significativa de ata un 89% nas hospitalizacións e unha caída importante no número de mortes. Unha das súas vantaxes é que, ao poder administrarse por vía oral, permite realizar un tratamento ambulatorio. De todos xeitos, o antiviral está indicado para pacientes de SARS-CoV-2 con enfermidade leve ou moderada e que teñan un risco alto de progresar a covid grave, así como en vacinados maiores de 85, non vacinados maiores de 65 e persoas inmunodeprimidas.
