Smart Vitamins, spin off da Universidade de Santiago de Compostela (USC), pon en marcha o desenvolvemento dun fármaco para a prevención e tratamento da Covid-19. A vantaxe desta innovadora terapia, composta por vehículos nanométricos que portan distintos principios activos, orbita ao redor de tres aspectos clave: a vía de administración
intranasal, a súa capacidade de dirixirse ao sistema inmune e a natureza dos seus compostos bioactivos.
Con este tratamento preténdese en primeiro lugar reforzar a resposta inmune do paciente —comezando no lugar onde se asenta o coronavirus, o tracto nasal— e modular a
resposta adaptativa para conter o exceso de inflamación, que trae consecuencias moi
negativas para a persoa enferma. A compañía pretende agora trasladar a ensaios clínicos as súas formulacións SDN-Nanodecov, en colaboración coa USC, o Instituto de Investigación Sanitaria de Santiago e co apoio financeiro do programa “Conecta Covid” da Axencia Galega de Innovación.
Obxectivos
Segundo Alfredo Bermúdez Castro, co-fundador da compañía, o potencial deste tratamento ten un mecanismo de acción sumamente interesante para o tratamento da Covid-19, tanto administrado de forma individual como en combinación con outros fármacos, algo especialmente relevante ante as novas variantes que poidan xurdir fronte ás cales as vacinas actuais ofrezan unha protección parcial. Por iso, obxectivo desta empresa é crear un tratamento intranasal que poida ser administrado na casa, baixo prescrición médica e que reforce o estado do paciente tras o contacto cun positivo ou a aparición dos primeiros síntomas, sen xerar efectos secundarios.
Equipo investigador
A dirección científica irá da man de María José Alonso, cofundadora da empresa e creadora desta tecnoloxía de nanovehículos intelixentes. Ademais, participarán activamente outros investigadores de prestixio internacional como Carlos Diéguez, director do Centro Singular de Investigación en Medicina Molecular e Enfermidades Crónicas da Universidade de Santiago; Luís Enjuanes, virólogo do Consello Superior de Investigacións Científicas e un dos maiores expertos mundiais en coronavirus e Santiago González, xefe do grupo de investigación en inmunología do Institute for Research in Biomedicine Bellinzona.
Tras o desenvolvemento preclínico que terá lugar durante o próximo ano 2022, realizarase un ensaio clínico exploratorio no Complexo Hospitalario Universitario de Santiago (CHUS) baixo a coordinación do Dr. Antonio Pouse, xefe do servizo de medicina interna do CHUS e o Dr. Anxo Fernández. Neste momento, a compañía prepárase para a captación dunha rolda de financiamento que permita completar os ensaios clínicos do fármaco e explora colaboracións con distintas empresas farmacéuticas para acelerar o seu proceso de translación ao mercado.
