Domingo 21 Abril 2024

Dous de cada dez adolescentes galegos presenta síntomas de depresión grave e moderada

O informe ‘Adolescencia, Tecnoloxía, Saúde e Convivencia’, da USC e Fundación Barrié evidencia como 1 de cada 4 adolescentes fan un uso problemático da Internet

Preto dun 20% dos e das adolescentes galegas presentan síntomas de depresión grave e moderada. Ademais, o 12,7% ten ideas suicidas recorrentes. Estas cifras multiplícanse por 3 ou 4 entre as persoas que padecen acoso escolar. Son datos extraídos do informe ‘Adolescencia, Tecnoloxía, Saúde e Convivencia’ elaborado por USC e Fundación Barrié, cunha mostra final, logo dun proceso de depuración, de 8.833 adolescentes, con idades comprendidas entre os 12 e os 18 anos.

O obxectivo do estudo foi realizar un diagnóstico do uso que os e as adolescentes galegas fan das TRIC (Tecnoloxías das Relacións, a Información e a Comunicación). A investigación establece como os niveis de benestar emocional e satisfacción coa vida son inferiores entre as mozas e a taxa de depresión e de ideación suicida é 3-4 veces maior (18,1% fronte ao 6,7% dos mozos). A investigación está coordinada polo profesor da Facultade de Psicoloxía da USC, Antonio Rial Boubeta, quen presentou os resultados xunto a Carmen Arias Romero, directora da Fundación Barrié.

Publicidade

O estudo tamén constata como, polo menos, 1 de cada 4 adolescentes galegos fai un uso problemático da Internet. Entre os seus principais riscos, destacan a pornografía, o sexting e o grooming. O 44% dos adolescentes galegos recoñece consumir pornografía en liña, o 42,2% admite intercambiar mensaxes sexuais en liña (sexting) e o 11,6% recibir unha proposición sexual por parte dun adulto (grooming). As mozas experimentan presións con maior frecuencia para enviar fotografías ou vídeos íntimos (18,6% fronte ao 6,9% dos mozos). O estudo detecta como máis do 40% dos adolescentes galegos presenta problemas frecuentes (todas as semanas) relacionados co estado de ánimo, a ansiedade e a irritabilidade.

Videoxogos e acoso

A taxa de adicción aos videoxogos sitúase en Galicia no 4%, o que afecta a máis de 5.000 adolescentes. A esa porcentaxe habería que engadir un 13,1% adicional para os que os videoxogos estarían a empezar a converterse nun problema. Estas cifras increméntanse canto maior é a frecuencia de xogo e as horas que se lle dedican. Ademais, obsérvase unha relación entre o consumo de videoxogos e o acoso escolar.

Polo menos 1 de cada 5 adolescentes sofre acoso escolar (22,9%) en Galicia. As cifras son maiores entre os que xogan habitualmente a videoxogos violentos designados como PEGI 18. O seu consumo frecuente ao comezo da adolescencia (12-13 anos) fai duplicar as taxas de agresores (3,6% fronte ao 1,7%).

Ademais, polo menos 1 de cada 10 adolescentes que apostan (12%) podería estar a desenvolver unha adicción ao xogo. Este é outro dos aspectos abordados polo estudo xa que o 12,5% recoñece verse obrigado a pedir diñeiro prestado para xogar ou saldar as súas débedas e un 12,1% mesmo a roubar. Estes problemas multiplícanse por 10 cando existe unha adicción ao xogo.

O estudo tamén apunta a como máis do 25% dos adolescentes non come nunca ou case nunca coa súa familia; denuncia unha mellorable hixiene do sono; e subliña as dificultades que presentan os mozos e mozas para aceptar a súa imaxe corporal, entre outros aspectos.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Os bebés expostos ao tabaco teñen maior probabilidade de consumir antibióticos

Un estudo galego analiza os factores asociados ao consumo deste medicamento cunha mostra de 18.882 mulleres

As feces dos osos da cordilleira Cantábrica falan… e teñen boas noticias

Un estudo no que participa a USC investiga o estado actual de saúde destes exemplares para impulsar a recuperación das poboacións

A historia da primeira industria galega que empregou a máquina de vapor

Un estudo da USC analiza ‘La Victoria’, a descoñecida fábrica de fundición e louza da Coruña creada en 1844

Este mecanismo dana a capa dos nervios en doenzas como a esclerose múltiple

O estudo realizado por un equipo de investigación do CiMUS publícase este venres na prestixiosa revista ‘Science Advances'