Estes días 26 e 27 de abril celébrase no Palacio de Exposicións e Congresos de A Coruña (Palexco) o I Congreso galego de persoas con cancro, organizado pola Asociación Española contra o Cancro (AECC). O congreso, no que se prevé unha asistencia de arredor de 1.000 persoas, pretende ser un punto de encontro e diálogo entre pacientes, familiares e profesionais. Neste sentido, intégranse tódalas entidades que loitan contra o cancro en varias mesas de discusión, conferencias, e 8 actividades que se desenvolverán simultaneamente nas horas programadas.
Os principais obxectivos son coñecer as necesidades dos pacientes e ofrecer as ferramentas necesarias, responder dúbidas con información veraz e actualizada e o intercambio de experiencias das persoas afectadas.
Expertos do ámbito da oncoloxía
No congreso participarán expertos de distintas asociacións relacionadas co ámbito da oncoloxía, como Marisol Soengas, directora do Grupo de Melanoma do Centro Nacional de Investigacións Oncolóxicas (CNIO) e Francisco Barón Duarte, membro da Sociedade de Coidados Paliativos e da Sociedade Oncolóxica de Galicia (SOG).
Tamén acudirán profesionais dos Complexos Hospitalarios Universitarios de varias cidades: Jesús García Mata (Ourense), especializado en cancro de mama; Rosario García Campelo, especializada en cancro de pulmón no (A Coruña); e Martín Lázaro Quintela, especialista en cancro de pulmón e xenitourinario (Vigo).
Ademais da dimensión científica, o evento funciona como espazo de xuntanza do ámbito galego. Dende a organización remárcase o carácter de unidade de “a nosa terra” e de tódolos implicados no confrontamento con esta enfermidade. Neste sentido, o venres ás 20.30h organízase na Sala Pelícano o encontro “Xuntos, máis fortes”, cun espectáculo músical.
Outra actividade organizada, co obxectivo de difundir mensaxes de superación e crecemento para contribuir á concienciacón e sensibilización, e o primeiro certame literario autonómico para pacientes con cancro, promovido polas catro Xuntas Provinciais da AECC.
Pódese descargar o programa do congreso en PDF aquí.
