Un estudo realizado por investigadores de Noruega e Estados Unidos acaba de confirmar que existen correlacións xenéticas entre a síndrome do intestino irritable (SII) e os trastornos de saúde mental como a ansiedade, a depresión, a enfermidade bipolar e a esquizofrenia. Segundo os equipos das universidades de Oslo, Bergen e California, o resultado da súa investigación serve para entender a complexa relación entre o cerebro e o intestino, e abre máis posibilidades para o tratamento da SII.
Para a realización do estudo, os investigadores analizaron os datos de 53.400 persoas con colon irritable e outras 433.201 persoas sas. O que buscaba o equipo eran loci, é dicir, localizacións específicas dentro de secuencias de ADN onde os xenes puidesen suxerir un maior risco dun problema de saúde en particular. Para analizar todos estes datos empregaron un método estatístico desenvolvivo recentemente por un dos membros do equipo.
Os resultados da análise indican que a SII e a saúde mental están fortemente influenciadas por unha variedade de xenes. Neste caso, descubriuse que varios deles eran compartidos. Os investigadores identificaron 70 loci únicos onde as variantes xenéticas indican risco de SII, e sete deses mesmos xenes tamén están asociados co trastorno de ansiedade xeneralizada, 35 con depresión, 27 con trastorno bipolar e 15 con esquizofrenia.
A inflamación do intestino pode facer que as bacterias se filtren ao sangue e cheguen ao cerebro
“Atopamos unha ampla superposición polixénica entre o SII e os trastornos psiquiátricos e, en menor medida, coas enfermidades gastrointestinais”, indican os investigadores no artigo. Crese que case unha de cada dez persoas en todo o mundo vive con SII, o que pode provocar cambras, dor e diarrea. Aínda que se descoñecen as súas causas, xeralmente considérase que está relacionada coa forma en que o cerebro responde aos nervios do intestino.
Este novo estudo apoia isto a nivel xenético e brinda aos investigadores e profesionais da saúde novos vínculos entre o intestino e o cerebro. A investigación tamén lanza luz sobre as vías que dan orixe á SII que non están relacionadas co sistema nervioso, o que podería ofrecer enfoques alternativos de tratamento.
Relación co cerebro
Nesta ocasión, os investigadores non afondaron en ningún mecanismo relacionado coa superposición xenética, pero suxiren que a inflamación do intestino pode facer que as bacterias se filtren ao sangue e cheguen ao cerebro, o que pode provocar cambios cognitivos e de comportamento. e podería explicar a alta coexistencia do SII con trastornos psiquiátricos.
Os científicos continúan investigando a forma en que están vinculados o noso cerebro e o noso ventre, desde a forma en que unha mellor educación protexe o intestino ata como certos tipos de bacterias se asocian co desenvolvemento do alzhéimer. “Isto amplía a nosa comprensión da xenética da SII e da súa relación coas enfermidades gastroenterolóxicas e psiquiátricas”, afirma Markos Tesfaye, bolseiro posdoutoral do Instituto de Medicina Clínica da Universidade de Oslo e participante no estudo.
Referencia: Shared genetic architecture between irritable bowel syndrome and psychiatric disorders reveals molecular pathways of the gut-brain axis (Publicado en Genome Medicine)
