Únete á nosa canle de Whatsapp
Non, non hai casos confirmados de coronavirus en Galicia. Despois de descartarse un caso sospeitoso nunha persoa que foi ingresada no hospital Álvaro Cunqueiro de Vigo, unha mensaxe que circulou a través da rede de Whatsapp, e que algunhas persoas sitúan na Coruña, apunta á presenza dun positivo no hospital da cidade. Porén, a Consellería de Sanidade confirmou este martes a falsidade do boato, pedindo ao mesmo tempo que a xente non comparta polas redes este tipo de rumores.
#StopBulos
Si te llega por #WhatsApp un audio en el que una persona asegura ser trabajador de un hospital gallego y cuenta que tienen aislado a un paciente por positivo en #coronavirus, ES FALSO ❌.
Te invitamos a borrarlo y por supuesto no lo compartas 📵. pic.twitter.com/8jfqbPghwA— VOST GALICIA (@VOSTgalicia) February 10, 2020
Hai unha semana xa circulara outro boato sobre un posible caso en Noia, que foi desmentido tamén polo Sergas e o Ministerio de Sanidade. O propio Servizo Galego de Saúde, no marco dos plans de actuación previstos polo Ministerio, conta cun plan de vixilancia e control cos pasos que se deberían seguir en caso de detectar casos sospeitosos.
Porén, por agora, a doenza contaxiosa que máis preocupación en canto a número de casos está xerando é a gripe, que se atopa posiblemente no cumio da onda estacional desta tempada. Ata o de agora, desde o comezo da campaña, declaráronse nos hospitais galegos máis de 1.000 ingresos por gripe confirmada, 886 deles co virus A. Do total dos casos, 817 estaban dentro dos grupos de risco, ben por idade ou outros factores. Entre o total destes casos notificáronse 29 falecementos, 13 deles por gripe como causa.
