Xoves 28 Marzo 2024

Un estudo vincula o Alzheimer cunha bacteria bucal

Chámase Porphyromonas gingivalis, e segundo un estudo que acaba de ser publicado na revista Science Advances, parece gardar relación coa aparición do Alzheimer. Esta é unha bacteria chave na periodontite crónica, unha doenza que causa dor nas enxivas, e foi identificada no cerebro de afectados por esta doenza neurodexenerativa. Na liña de investigacións como a que dirixe a galega Sonia Villapol, que contemplan a posibilidade de que a microbiota do aparello dixestivo teña relación con estas enfermidades, o equipo liderado por Jan Potempa, da universidade de Louisville, os experimentos feitos en ratos expoñen que a infección oral por P. gingivalis derivou na presenza desta bacteria no cerebro, xunto a un aumento na produción de Beta amiloide, unha proteína relacionada co Alzheimer.

O equipo, que traballou en colaboración coa start-up farmacéutica Cortexyme, aclara que esta non é a evidencia definitiva para descubrir a causa do Alzheimer, pero é un resultado esperanzador. E lanza de novo unha posibilidade xa adiantada por algunhas liñas de investigación sobre esta doenza, que nas vindeiras décadas se convertirá nun problema de saúde pública: podería tratarse dunha infección. Ata o de agora, alén de leves evidencias hereditarias, a orixe de máis do 90% dos casos é descoñecida.

Publicidade

Atopouse correlación entre a presenza de Porphyromonas gingivalis e o avance das evidencias de Alzheimer no cerebro

Na investigación patrocinada por Cortexyme participaron laboratorios de varios países e continentes. En concreto, os autores sosteñen que “en máis do 90% das 50 mostras cerebrais atopáronse encimas tóxicas producidas pola bacteria que produce a periodontite”. Ademais, atopouse unha correlación entre os altos niveis de proteínas tau e ubiquitina e a periodontite crónica nas mostras de cerebros estudadas.

Para explorar se as bacterias estaban causando a doenza, o equipo limpou as enxivas de ratos sans cada dous días durante seis semanas, para despois establecer unha infección. Máis tarde atoparon a bacteria nos cerebros dos animais, coas neuronas deterioradas e niveis máis altos de Beta amiloide. E ao administrar aos ratos un fármaco que actúa sobre a periodontite, eliminouse do cerebro a bacteria que a causa mellor ca un antibiótico común, e reduciu a dexeneración resultante da produción de Beta amiloide.

A revista Science faise eco deste artigo na súa web, onde sinala tamén que “o estudo atopou en ratos que a bacteria induce cambios cerebrais típicos do Alzheimer”. Os resultados están xerando unha vaga de reaccións na comunidade científica, Robert Moir, un neurobiólogo de Harvard que atopou na súa investigación o impacto da proteína Beta amiloide na doenza, dixo a Science: “Estou dacordo coa idea de que esta bacteria poida ser un factor que contribúa ao Alzheimer, pero estou moitos menos convencido de que sexa a causante da enfermidade”.

A maior lonxevidade acarrea un aumento no impacto das doenzas cognitivas.
A maior lonxevidade acarrea un aumento no impacto das doenzas cognitivas.

Outros investigadores, como James Noble, da universidade de Columbia, que ten estudada a conexión entre a periodontite e o Alzheimer, recoñecen que é “claramente unha aproximación moi ampla” e que “son ideas que poden resultar estrañas, pero que parecen ter unha base”.

Isto non quere dicir, segundo adianta Noble, que toda a xente que padece periodontite (un 50% dos adultos, no caso dos Estados Unidos) estea en risco de ter Alzheimer. Porén, subliña que non estaría mal, como precaución, coidar a hixiene dental.

Science tamén recolle as palabras de Howard Fillit, director científico da organización Alzheimer’s Drug Discovery Foundation: “Fixeron moitos experimentos diferentes para propoñer que as dores de enxivas poden ser un obxectivo farmacolóxico na enfermidade; creo que paga a pena afondar, e estou contento de que se vaian facer ensaios clínicos”.

Ensaios en humanos

O equipo xa realizou probas previas con voluntarios humanos, e atopou que un medicamento semellante parecía seguro e amosaba sinais de mellorar a cognición en nove afectados de Alzheimer. Este ano comezará un ensaio de maior tamaño para comprobar estes avances.

Referencia: Porphyromonas gingivalis in Alzheimer’s disease brains: Evidence for disease causation and treatment with small-molecule inhibitors, publicado en Science Advances o 23 de xaneiro de 2019.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Os galegos de entre 18 e 34 anos, dos que menos dormen a sesta

Así o conclúe o novo estudo sobre os trastornos do sono en España, que apunta tamén que son os segundos que máis traballan de noite

Galicia notifica 10 mortes ao día por consumo de tabaco

A investigadora da USC Julia Rey Brandariz constata na súa tese que a comunidade galega é a duodécima que máis falecementos rexistra por esta substancia

Un novo test pode detectar o alzhéimer cunha precisión do 90 %

Unha investigación internacional con participación española desenvolveu unha proba que identifica un biomarcador clave chamado p-tau217

O aire en Europa é o máis seco dos últimos 400 anos

Unha investigación demostra que, desde principios do século XXI, se está a producir un desecamento xeralizado debido á actividade humana