Na parroquia de San Vicente de Trigás, no concello lugués de Mondoñedo, atopouse en 2023 un asentamento datado entre os séculos V e VII. Neste xacemento de época sueva achouse unha estrutura habitacional —que podería ser unha casa— e un forno. Agora, un equipo da Universidade de Santiago (USC) e da empresa Tempos Arqueólogos volverá a este enclave para continuar coa sondaxe realizada o ano pasado. “O noso obxectivo é reanudar a delimitación e documentación desta estrutura habitacional, así como confirmar que estamos ante a presenza dunha aldea altomedieval, un tipo de asentamento moi pouco coñecido para os séculos dos que estamos a tratar”, indica a directora da intervención, Celtia Rodríguez González.
Esta nova fase da escavación iniciarase o 27 de maio e continuará ata o 7 de xuño. Durante a intervención levarase a cabo a ampliación das sondaxes abertas en 2023 en dúas fincas propiedade de Miguel Chao. O director científico dos traballos, José Carlos Sánchez Pardo, sinala: “Os traballos en Mondoñedo permiten coñecer, dende a colaboración científica e a interdisciplinariedade, tanto ás persoas que viviron aquí durante a Alta Idade Media como a evolución do uso da territorio. Estes traballos son fundamentais para entender a paisaxe rural da Galicia altomedieval“.
Un xacemento de “moito potencial”
Os principais obxectivos desta nova escavación son dous: en primeiro lugar, continuar coa sondaxe realizada no ano 2023, onde apareceu un forno do século V-VII d.C. e diversas estruturas asociadas a unha posible casa altomedieval; e en segundo lugar, avaliar os posibles muros descubertos a través da prospección xeofísica realizada en marzo pola empresa SOT. “Os resultados foron importantes e significativos porque demostra que a superficie do xacemento é moito maior do que se pensaba e ten moito potencial”, di Sánchez Pardo.
Malia que agora retoman as sondaxes, a investigación ao longo de 2023 e principios de 2024 continuou executándose a través do traballo dos materiais, a elaboración da memoria científico-técnica, así como a realización dunha prospección xeofísica. A intervención conta coa colaboración do Concello de Mondoñedo a través do asesoramento do arqueólogo Abel Vigo, así como coa participación interdisciplinar da especialista en arqueobotánica Leonor Peña Chocarro do CSIC de Madrid quen realizará unha análise das especies de plantas e cultivos que se utilizaban durante a fase altomedieval do xacemento.
