Bautizar a vindeira borrasca co teu nome custa 199 euros

Universidade Libre de Berlín.
Universidade Libre de Berlín.

Mentres a tormenta Stephanie bate Galicia, a cidadá alemá Stephanie Schrecker está a vivir unha homenaxe. Porque esta muller pagou por lle dar o seu nome á borrasca. O mesmo que a súa compatriota Ruth Radeke, que pasou por caixa para bautizar a anterior cicloxénese explosiva. En poucos días, Kristina Gaster terá a honra de ver como o seu diminutivo cariñoso –“Tini”- arrasa Europa con ventos tempestuosos. Porque as tormentas adoitan levar nomes de persoas reais.

Bautizar un temporal é posible e ten prezo: 199 euros. Pode ser un orixinal regalo para San Valentín. Ou a oportunidade de dar unha sorpresa á sogra. O seu nome sairá en todos os telexornais, mentres a borrasca destrúe paseos marítimos, derruba árbores, pecha aeroportos e corta electricidade, estradas e vías férreas.

Publicidade

En Europa, o organismo encargado dos nomes é a Universidade Libre de Berlín. Abonda encher un formulario e aboar o prezo para conseguir entrar na lista tras PetraQumairaRuth e Stephanie. O bautismo prodúcese por orde alfabética entre todos os que pagaron. E cando se chega á “z”, volve empezar pola “a”.

É posible que a muller ou a sogra non queden satisfeitas co agasallo. Pero non importa. Os anos pares, as borrascas chámanse con nome de muller. E os impares, de home. Así que en 2015 terán unha boa ocasión de desquitarse.

Poñer nome a un anticiclón sae máis caro porque duran máis tempo: 299 euros

A Universidade Libre berlinesa leva dende 1954 asignando os nomes aos fenómenos atmosféricos europeos. E dende 2002, permite aos cidadáns bautizalos, sempre previo pagamento. Os anticiclóns, máis duradeiros, son tamén máis caros: 299 euros. Pero non adoitan ter o impacto mediático das tormentas. Co diñeiro recadado, o Instituto de Meteoroloxía de Berlín financia parte das súas actividades.

Non é posible por agora bautizar os ciclóns tropicais. No caso dos tifóns (no Pacífico) e dos furacáns (no Atlántico), o nome asígnallo a Organización Meteorolóxica Mundial. O costume xurdiu durante a II Guerra Mundial nos EUA e mantense ata hoxe, con nomes xa míticos como o Katrina, que arrasou Nova Orleáns en 2005.

Campaña “Adopt a Vortex”

No último ano, unha compañía privada –Weather Channel– comezou a bautizar os fenómenos meteorolóxicos dos EUA pola súa conta, a cambio de cartos. A iniciativa espertou unha gran polémica, aínda que a canle o xustifica dicindo que un nome axuda ao público a identificar o risco e tomar precaucións ante unha alerta por xeo, neve, trebóns ou fortes ventos. Para moitos meteorólogos en realidade só se trata dun negocio.

En Europa, en cambio, a Universidade Libre de Berlín permite ao público poñer os seus nomes. E os fondos dedícanse maioritariamente a bolsas para os seus estudantes.

O programa ten o nome “Adopt a Vortex” (adopta un vórtice). E no seguinte enlace están os formularios para poder dar nome á vindeira borrasca sobre Galicia: ADOPT A VORTEX.

Ver a nova en castelán

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Case o 20% da poboación galega consome alcol a diario

Un estudo publicado por investigadores da USC determina as tendencias de consumo e os factores sociais e culturais que provocan o alcolismo

Denuncian que o poste dun pantalán leva máis dun mes na praia de Carril

Limpiarousa e Noia Limpa advirten que está composto por "materiais contaminantes" e acusan falta de compromiso ás administracións

Faneca, lirio, xurelo e pescada: os catro piares da dieta da toniña en Galicia

Un estudo do IEO e da UVigo analizou o contido estomacal de 72 cetáceos varados no litoral galego entre 1990 e 2018

Un Vesubio en Galicia? O supervolcán que arrasou o norte peninsular hai 475 millóns de anos

Ollo de Sapo é unha formación xeolóxica situada no concello de Monfero, que se creou a raíz dunhas erupcións colosais no período Ordovícico