Pontes derrubadas, estradas desfeitas e centos de vivendas inundadas. Estas imaxes catastróficas quedaron gravadas na retina de moitos veciños de Madrid e Toledo, onde o paso dunha DANA a pasada fin de semana causou grandes estragos materiais e humanos, deixando cinco falecidos e tres desaparecidos. Un escenario que agora afecta a Grecia polo paso da borrasca Daniel, que xa arrasou varias zonas do país. Podería acontecer algo así en Galicia? Unha ferramenta do Ministerio de Transición Ecolóxica permite saber se vives nunha zona inundable e cal é o risco de que a túa vivenda quede anegada ou arrasada ante fenómenos meteorolóxicos tan extremos como os que azoutaron o centro peninsular e Grecia nos últimos días.
En concreto, o Sistema Nacional de Cartografía de Zonas Inundables é a aplicación que puxo en marcha o Ministerio para saber cal é o risco de inundación nunha zona en concreto, podendo consultarse incluso rúa por rúa. O funcionamento do mapa interactivo é doado e podémonos desprazar co cursor por todo o territorio do Estado. Uns paneis despregables situados na parte superior do mapa permítennos aplicar filtros en función dos nosos intereses. Por exemplo, podemos saber como se estenden as zonas inundables segundo diferentes niveis de probabilidade, coñecer a súa cartografía ou incluso consultar o inventario de presas e embalses de España. Así mesmo, pódese facer unha busca por cauce, demarcación xeográfica e incluso comunidade autónoma e provincia.
As zonas máis afectadas de Galicia
En Galicia, a zona máis extensa e na que hai un maior risco para a poboación se se chegase a inundar está en Ourense. Máis en concreto, na antiga lagoa de Antela. O núcleo de Xinzo de Limia tamén se vería plenamente afectado e, en menor medida, outras vilas como Vilar de Santos e Rairiz de Veiga. Nestes dous últimos puntos, o risco é menor que nos anteriores segundo a lenda de cores do mapa, que vai dende o vermello (máis perigo) ata o amarelo (menos perigo). Na provincia de Ourense tamén se verían afectadas outras zonas, como boa parte do núcleo de Verín. De igual modo, salienta o anegamento que sufriría a cidade de Ourense nas zonas lindantes ao río Miño, dado que este filtro en concreto mide o risco para a poboación se se anegan os cauces fluviais.
Iso tamén acontecería en Vigo, onde as zonas de risco coinciden coas beiras do río Lagares, que cruza a cidade olívica. En Pontevedra, polo paso do río Lérez, o maior risco estaría na illa das Esculturas e, por extensión, nunha parte do campus universitario. No caso de Lugo, as zonas do Miño son as que estarían nun risco intermedio de anegamento para a poboación. Nas cidades da Coruña e Ferrol non hai áreas céntricas afectadas. En Santiago si habería risco nalgunhas zonas que baña o Sar pero, de novo, sen risco alto para os veciños. Unha situación ben distinta a que se viviría en vilas máis pequenas, como Caldas de Reis e Vilagarcía de Arousa, cuxos centros estarían en risco vermello por anegamentos fluviais.
Podes consultar o mapa interactivo na seguinte ligazón.
