A Asociación de Desenvolvemento Rural As Mariñas-Betanzos organiza este venres 13 de abril en Culleredo unha xornada informativo sobre a xestión e o control de especies exóticas invasoras. O acto conta coa colaboración da Deputación da Coruña, o Concello de Culleredo e o portal plantasinvasoras.org.
A xornada está dirixida a responsables e técnicos municipais, empresas de xardinería e de xestión ambiental, así como a calquera outra entidade ou persoa interesada na xestión, control e eliminación deste tipo de especies. O acto comezará ás 10 da mañá na Aula de Natureza Juan Lembeye (Avenida de Xoán Carlos I, O Burgo).
A actividade inaugurarase coa intervención de José Ramón Rioboo, alcalde de Culleredo, e José Antonio Santiso, presidente da Asociación As Mariñas-Betanzos. A continuación falará Dominique Roux, de plantasinvasoras.org, sobre o impacto das especies invasoras en Galicia e as estratexias para a xestión, prevención e priorización de accións para a súa erradicación.
O acceso á charla é de balde. Para máis información e inscricións, é posible contactar no teléfono 981 669 541 ou no correo info@marinasbetanzos.gal.
